Կիպրոսը Սիրիային առաջարկել է ազատվել քիմիական զենքի պաշարներից եւ պաշտպանել է սիրիական քրդերի իրավունքները

Կիպրոսը պատրաստ է օգնել Սիրիայում քիմիական զենքի մնացած պաշարների վերացմանը եւ աջակցել այն մարդկանց որոնմանը, որոնց ճակատագիրն անհայտ է մնում ավելի քան մեկ տասնամյակ՝ պատերազմից հետո, շաբաթ օրը հայտարարել է Կիպրոսի արտգործնախարար Կոնստանտինոս Կոմբոսը, հաղորդել է Associated Press-ը։

Կոմբոսը նշել է, որ Կիպրոսի առաջարկը հիմնված է սեփական փորձի վրա՝ ինչպես 11 տարի առաջ Սիրիային քիմիական զենքից ազատվելուն օգնելու, այնպես էլ 1960-ական թթ. կիպրոսցի հույների եւ կիպրոսցի թուրքերի միջեւ կռիվների եւ 1974թ. թուրքական ներխուժման ժամանակ անհետացած հարյուրավոր մարդկանց որոնման տասնամյակների ընթացքում։

2013թ. Կիպրոսը հյուրընկալել է ՄԱԿ եւ Քիմիական զենքի արգելման կազմակերպության առաքելության աջակցության բազան՝ Սիրիայի քիմիական զենքը հեռացնելու եւ ոչնչացնելու համար:

«Որպես հարեւան երկիր, որը գտնվում է Սիրիայից ընդամենը 65 մղոն հեռավորության վրա, Կիպրոսը շահագրգռված է Սիրիայի ապագայով: Այնտեղ տեղի ունեցող իրադարձություններն ուղղակիորեն կազդեն Կիպրոսի վրա, հատկապես պոտենցիալ նոր միգրացիոն հոսքերի եւ ահաբեկչության ու ծայրահեղականության ռիսկերի առումով»,- ասել է Կոմբոսը Associated Press-ին:

Կոմբոսը հայտնել է, որ իր գործընկերները ողջ տարածաշրջանում «խորապես մտահոգված են» Սիրիայի ապագա անվտանգության համար, հատկապես ծայրահեղական խմբավորումների հնարավոր վերածնմամբ, ինչպիսին է «Իսլամական պետությունը»: Մյուս մարտահրավերները ներառում են երկրից դուրս միգրացիոն նոր հոսքերը, ինչպես նաեւ կանանց եւ փոքրամասնությունների, այդ թվում՝ դրուզների, քրիստոնյաների, հրեաների եւ քրդերի անվտանգությունն ու իրավունքները՝ «Սիրիայի հարուստ խճանկարը պահպանելու համար»:

«Սա հատկապես կարեւոր է պոտենցիալ սոցիալական եւ ժողովրդագրական ինժեներիայի ֆոնին, որոնք քողարկված են որպես «անվտանգության» միջոցներ, եւ որոնք կարող են էլ ավելի ապակայունացնել երկիրը»,- ասել է Կոմբոսը: Դիվանագետը նաեւ մատնանշել է վերջին շրջանում թմրանյութերի արտադրության աճը, ինչպիսին է խթանիչ Captagon-ը, կապված մարդկանց առեւտրի եւ զենքի մաքսանենգության ցանցերի հետ:

Կիպրոսի արտգործնախարարն ասել է, որ Սիրիայի քրդերի վրա շարունակվող հարձակումները պետք է անհապաղ դադարեցվեն՝ հաշվի առնելով այն դերը, որ քրդական ուժերը խաղացել են ծայրահեղական ուժերի դեմ, ինչպիսին եղել է «Իսլամական պետություն» խմբավորումը վերջին տասնամյակում:

Նա հավելել է, որ Սիրիայի կողմից ղեկավարվող ներառական ժողովրդավարության անցնելու գործընթացը պետք է ինտեգրի քրդերի օրինական պահանջները՝ միաժամանակ պահպանելով երկրի միասնությունն ու տարածքային ամբողջականությունը։