Ուկրաինան Կանադայից 290,5 միլիոն դոլարի չափով լրացուցիչ վարկ կստանա
Ուկրաինան Կանադայից 400 միլիոն կանադական դոլարի (290,5 միլիոն ԱՄՆ դոլար) չափով լրացուցիչ վարկ կստանա։
Դրա մասին հայտնել են Ուկրաինայի ֆինանսների նախարարությունից։
«Այսօր՝ հոկտեմբերի 11-ին, Ուկրաինայի ֆինանսների նախարար Սերգեյ Մարչենկոն Կանադայի կառավարության հետ ստորագրել է 4-րդ լրացուցիչ համաձայնագիրը՝ 400 միլիոն կանադական դոլարի չափով լրացուցիչ վարկի համար»,- ասված է նախարարության պաշտոնական կայքի տարածած հաղորդագրության մեջ։ Տրվում է 10 տարի ժամկետով, տոկոսադրույքը կազմում է տարեկան 1,5%։ Արտոնյալ ժամկետը 4,5 տարի է՝ սկսած դրամական միջոցների ստացման օրվանից:
Ինչպես նշել է Մարչենկոն՝ Կանադան Ուկրաինային աջակցելու առաջատարներից մեկն է. 2022 թվականի փետրվարից Կանադայի ֆինանսական աջակցությունն Ուկրաինային կազմում է ավելի քան 5 միլիարդ դոլար:
