Ռուսաստանն ու Ադրբեջանը շարունակում են քննարկել Ստեփանակերտում ՌԴ հյուպատոսություն բացելու հարցը
«Ռուսաստանն ու Ադրբեջանը շարունակում են քննարկել Արցախում ՌԴ գլխավոր հյուպատոսություն բացելու հնարավորության հարցը»,- ՏԱՍՍ-ին տված հարցազրույցում ասել է Մոսկվայում Ադրբեջանի դեսպան Փոլադ Բյուլբյուլօղլուն։
«Ռուսաստանը ցանկություն է հայտնել բացել հյուպատոսություն, քանի որ մենք արդեն ունենք երկու գլխավոր հյուպատոսություն Ռուսաստանում՝ Եկատերինբուրգում և Սանկտ Պետերբուրգում։ Հաշվի առնելով Ռուսաստանի մեծությունն ու ադրբեջանցիների թիվը՝ դա տրամաբանական է։ Ադրբեջանում, ընդհակառակը, հյուպատոսությունների աշխատանքն ավելի սահմանափակ է, սակայն քննարկումները շարունակվում են, տարբեր տարբերակներ են առաջարկվում»,- նշել է Բյուլբյուլօղլուն։
Ավելի վաղ Դաշնային խորհրդի միջազգային հարցերով կոմիտեի ղեկավար Գրիգորի Կարասինը հայտարարել էր Ստեփանակերտում Ռուսաստանի գլխավոր հյուպատոսության բացման հնարավոր նախապատրաստման մասին։ Նրա խոսքերը զայրույթ էին առաջացրել ադրբեջանական հասարակության շրջանում։
