«Օրենսդրության զարգացման և իրավական հետազոտությունների կենտրոն»-ը գոհ է մատակարարից. նորից գնում է արել, այս անգամ՝ հրատապ
Արդարադատության նախարարության «Օրենսդրության զարգացման և իրավական հետազոտությունների կենտրոն» հիմնադրամն օրերս միջոցառումների հետ կապված ծառայություններ է գնել պետական գերատեսչությունների ֆավորիտ ընկերություններից մեկից՝ «Լոռե թրավել»-ից։
Գնումը կատարվել է հրատապ մեկ անձ ոչ մրցակցային գնման ընթացակարգով․ պայմանագրի գինը կազմել է 2 միլիոն 600 հազար դրամ։
Պայմանագրի տեխնիկական բնութագրից տեղեկանում ենք, որ միջոցառումը նախատեսվում է Կոտայքի մարզում՝ Վարդենիսի հյուրատանը։
Ի դեպ, «Օրենսդրության զարգացման և իրավական հետազոտությունների կենտրոն» հիմնադրամն ընդամենն ամիսներ առաջ՝ փետրվարին, դարձյալ նույն ընկերությունից գնել է միջոցառման հետ կապված ծառայություններ՝ գնանշման հարցում ընթացակարգով. այդ անգամ պայմանագրի գինը կազմել է 15 միլիոն դրամ։
Նշենք, այս ընկերության հիմնադիրը Վլադիմիր Գևորգյանն է, որն իր ու իր ընտանիքին առնչվող տարբեր ընկերություններով պետգնումներում մատակարարների թոփ շարքում է։
