Վաղը «կողմ» կոճակը սեղմող պատգամավորներն իրենք են ունենալու փաստաբանի կարիք. Փաստաբանները գործադուլ են իրականացնում
Այսօր փաստաբանները բողոքի ակցիա են իրականացնում՝ հրաժարվելով Հայաստանի Հանրապետության պետական մարմիններում (այդ թվում՝ դատարաններում, նախաքննության մարմիններում) պաշտպանություն կամ ներկայացուցչություն իրականացնելուց՝ պահանջելով Ազգային ժողովից «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» օրենքի նախագծից հանել փաստաբաններին վերաբերող խնդրահարույց իրավակարգավորումները: Աշխատելու են միայն քաղաքական բանտարկյալներին և քաղաքական հետապնդվողներին վերաբերող գործեր վարող փաստաբանները։ Այդ առիթով փաստաբանների պալատում հրավիրվել էր մամուլի ասուլիս:
«ՀՀ քաղաքացին այս օրենքի ընդունումից հետո ստիպված է լինելու 38%-ով ավելի վճարել փաստաբանական ծառայությունների դիմաց: Այսօր դատարաններում քննվում է շուրջ 250 000 գործ: Այսինքն՝ սա առնչվում է այդքան քաղաքացու: Կարող է անհնարին դառնալ անվճար իրավաբանական ծառայությունների մատուցումը, որովհետև հակառակ դեպքում փաստաբանը ստիպված է լինելու այդ հարկը վճարել: Բեռն ընկնելու է ֆիզիկական անձանց վրա, որովհետև ծառայության սպառողը շարքային քաղաքացիներն են: Իրավաբանական անձանց համար ավելի մատչելի է լինելու ծառայությունը»,- ասուլիսի ժամանակ ասաց Փաստաբանների պալատի նախագահ Սիմոն Բաբայանը:
Վերջինս նկատեց՝ նախագծին բացասական եզրակացություն են տվել Մարդու իրավունքների պաշտպանն (ՄԻՊ) ու արդարադատության նախարարությունը:
Փաստաբան Կարեն Մեժլումյանն էլ նշեց՝ «Այսօր բողոքի ակցիա իրականացնող այսքան մարդու են բերման ենթարկում: Էս օրենքից հետո գալու են, բերման ենթարկվածներին օգնություն ցուցաբերող իրավապաշտպաններին ասեն՝ վճարեք:
Արմինե Ֆանյանն էլ նշեց՝ հանրային պաշտպանի գրասենյակի բեռը շեշտակի ծանրանալու է, հակառակ դեպքում մարդը զրկվելու է իրավաբանական օգնություն ստանալու սահմանադրական իրավունքից:
«Էսօր չկա փաստաբան, որն անվճար գործ չունի: Կողմ կոճակը սեղմող պատգամավորները վաղն ունենալու են փաստաբանի ծառայություններից օգտվելու կարիք, ու վաղն իրենք են ստիպված լինելու վճարել այդ գումարները»,- ասաց փաստաբանը:
Հիշեցնենք՝ «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» օրենքի նախագծով նախատեսվում է փաստաբանական ծառայությունների մատուցումից առաջացող շրջանառության հարկը 2024 թ. հոկտեմբերի 1-ից դարձնել 10 տոկոս` ներկայիս 5 տոկոսի փոխարեն: Ըստ այդմ կրկնապատկվել է շրջանառությունից առաջացող հարկային բեռը, իսկ արդեն 2025 թ. հունվարի 1-ից նախատեսվում է բացառել փաստաբանական ծառայություն մատուցող հարկ վճարողների գործունեությունը շրջանառության հարկի համակարգում:
Նախագծի համաձայն` փաստաբանական ծառայություն մատուցող սուբյեկտները 2025 թ. հունվարի 1-ից հարկադրված են լինելու գործել հարկման ընդհանուր համակարգում, ըստ այդմ` մատուցվող փաստաբանական ծառայությունների համար կիրառվելու է 20 տոկոս ԱԱՀ: Դրանից զատ, հարկման ընդհանուր համակարգում գործելու դեպքում փաստաբանական ծառայություն մատուցողները վճարելու են նաև շահութահարկ, որի դրույքաչափը կազմում է 18 տոկոս, և որը հաշվարկվում է հարկվող շահույթից` հարկային տարվան վերագրվող համախառն եկամտի և նվազեցումների (ծախսեր, կորուստներ և այլ նվազեցումներ) տարբերությունից:
Մանրամասները՝ տեսանյութում:
