«Փաստաբանության թիվ մեկ խնդիրը միասնականության և անկախության պահպանումն է». Սիմոն Բաբայան
Սեպտեմբերի 13-ին տեղի կունենա Փաստաբանների պալատի նախագահի ընտրությունը. նախագահի թեկնածու է առաջադրվել 4 տարի պալատի նախագահ Սիմոն Բաբայանը, որը, դեպ, միակ թեկնածուն է։
168TV-ի «Ռեվյու» հաղորդաշարի եթերում, խոսելով Փաստաբանների պալատի նախագահի պաշտոնում կրկին առաջադրվելու մասին, Բաբայանն ընդգծեց՝ իր այդ որոշման պատճառը շարունակականություն պահանջող ծրագրերն ավարտին հասցնելու ցանկությունն է։
Ըստ Բաբայանի՝ նախորդող 4 տարվա ընթացքում բազմաթիվ ծրագրեր են կատարվել, որոնցից շահողը Հայաստանի փաստաբանական համայնքն է եղել։
«Ծրագրերից բացի, Փաստաբանական պալատի առաջ ծառացած փորձությունները շատ են, իսկ դրանց հաղթահարման ընթացքն ամենօրյա աշխատանք է պահանջում»,- ասաց նա։
Շարունակելով փորձությունների շարքը՝ թեկնածուն առանձնացրեց փաստաբանների հարկային բեռի ավելացման խնդիրը, փաստաբանների նկատմամբ բռնության դեպքերը։
«Անհրաժեշտ է միջազգային կառույցների հետ աշխատանքը տանել այնպես, որ Հայաստանը միանա փաստաբանների իրավունքների պաշտպանության կոնվենցիային։ Սրանք այնպիսի խնդիրներ են, որոնց լուծման համար աշխատանք տանելու անհրաժեշտություն կա»,- նկատեց Սիմոն Բաբայանը։
Խոսելով, մասնավորապես, 2025 թվականի հունվարից փաստաբանական համայնքի համար հարկային բեռն ավելացնելու օրենքի դեմ պայքարի շարունակականության մասին՝ Բաբայանն ընդգծեց՝ այս հարցում կա նաև քարոզչական աշխատանք տանելու մեծ անհրաժեշտություն։
«Այս խնդիրը միայն փաստաբանինը չէ՝ քաղաքացունն է. 30 տոկոսով հարկային բեռի ավելացումը քաղաքացու վրա է տեղափոխվելու։ Մյուս կողմից՝ չի բացառվում, որ փաստաբանների մի մասն անցնի ստվեր»,- ասաց Սիմոն Բաբայանը։
Հարցազրույցի մանրամասները՝ տեսանյութում։
