ՊԵԿ-ը հրատապ գնել է պլանշետներ. 60 պլանշետի համար վճարել է 26 միլիոն 820 հազար դրամ

Պետական եկամուտների կոմիտեն հրատապ մեկ անձ գնման ընթացակարգով օրերս գնել է պլանշետներ։ Պետգնումների armeps էլեկտրոնային համակարգում տեղադրված պայմանագրից տեղեկանում ենք՝ Samsung Galaxy Tab S9, Samsung LLC մոդելի 60 պլանշետի համար ՊԵԿ-ը վճարելու է 26 միլիոն 820 հազար դրամ (ներառյալ՝ ԱԱՀ-ն)։

Ըստ պայմանագրի՝ մեկ միավորի գինը 447 000 դրամ է։ Ընկերությունը, որից գնում է կատարել ՊԵԿ-ը, «Նոար Գրուպ» ՍՊԸ-ն է, որը, ըստ իրավաբանական անձանց e-register համակարգի, գրանցվել է 2023 թվականին և պատկանում է Նորայր Մանուկյանին։

Հետաքրքրական է, որ այդ պարամետրերով պլանշետների շուկայական գինը Հայաստանում, ըստ տարբեր վաճառասրահների տրամադրած տեղեկությունների, տատանվում է 349-360 հազար դրամի սահմաններում, իսկ կաուչուկապատ կաշվե պաշտպանիչ պատյանը, որը ներառված է պայմանագրի տեխնիկական բնութագրում, վաճառասրահներում արժե 30 հազար դրամ։

Այսինքն՝ այդ պլանշետի ձեռքբերումն այդ տեխնիկական բնութագրով, հավանաբար կկազմեր ոչ ավել, քան 380-390 հազար դրամ, եթե գնվեր, օրինակ, Սամսունգի հայաստանյան գործընկեր որևէ ընկերության վաճառասրահից։ Մեծաքանակ գնման դեպքում՝ այդ գինը գուցե առավել մատչելի կլիներ։