Ռուսաստանը հայտնել է ուկրաինական գնդակոծության հետևանքով Բելգորոդի գյուղերից մեկում 1 զոհի մասին
Ռուսաստանից հայտնել են, որ Ուկրաինայի զինված ուժերի կողմից Բելգորոդի մարզի Պոպովկա գյուղի գնդակոծման ժամանակ խաղաղ բնակիչ է զոհվել։ Բելգորոդի նահանգապետ Վյաչեսլավ Գլադկովը իր Telegram-ալիքում տեղեկացրել է նաև, որ զոհվածի կինը ծանր վիրավորվել է։
«Այսօր Կրասնայա Յարուգայի շրջանի Պոպովկա գյուղը երկու անգամ գնդակոծման է ենթարկվել է Ուկրաինայի զինված ուժերի կողմից: Դժբախտաբար, կրկնական գնդակոծման հետևանքով զոհվել է խաղաղ բնակիչ: Արկը մտել է մասնավոր բնակելի տուն, տարեց տղամարդը ստացած վնասվածքներից տեղում մահացել է, նրա կինը ստացել է ծանր բեկորային վնասվածքներ», – գրել է տարածաշրջանի ղեկավարը՝ հավելելով, որ տուժածը տեղափոխվել է հիվանդանոց:
Իսկ Ուկրաինայի Խարկովի մարզի իշխանությունները հայտնել են, որ Ռուսաստանը հրթիռով հարվածել է մարզի Վելիկի Բուռլուկ գյուղին։ 3 խաղաղ բնակիչ տուժել է։
Իր հերթին Ուկրաինայի զինված ուժերի գլխավոր շտաբը հայտնել է, որ գիշերը Ռուսաստանը 36 հարվածային կամիկաձե անօդաչուներով հարվածներ է հասցրել Ուկրաինայի տարածքին։ ԱԹՍ-ներից 27-ը խոցվել են։ Հարվածների տակ են հայտնվել Օդեսայի, Նիկոլաևի և Խերսոնի մարզերը։ Օդեսայում ԱԹՍ-ները հարվածել են լոգիստիկ ենթակառուցվածքների։
