Կտեսնեք, որ այս տարի նախարարը Սևանա լճից ավելի շատ է ջուր բաց թողնելու. Հակոբ Սանասարյան
«Քանի որ Սևանի մակարդակը գնալով պետք է բարձրացնենք, և այդտեղ շատ մաքրելու աղբ է լինում: Գործընթացը տարբեր ժամանակներում արդյունավետության որոշակի խնդիրներ է ունեցել: Սևանի մակարդակի բարձրացումը բոլորիս գլխավոր խնդիրն է: Այս պահին ջրային ռեսուրսների վիճակը լավ չէ, պարտավորված ենք Սևանից ոռոգման համար ջուր բաց թողնել՝ գյուղատնտեսությանը ոռոգման ջուր հասցնելու համար»,- ԱԺ-ում 2022 թ. բյուջեի կատարողականի քննարկման ժամանակ հայտարարեց շրջակա միջավայրի նախարար Հակոբ Սիմիդյանը:
Նա հայտնեց, որ բոլորի խնդիրն է՝ համատեղ գործողություններ և ջանքեր ներդնել, որպեսզի Սևանա լճի վրա գործադրվող ճնշումը թուլանա:
«Այս տարի այդ իմաստով լավ տարի մեզ չի սպասվում, և, ցավոք, Սևանն այս տարի էլ երևի կկանաչի, և դժվարություններ կունենանք»,- նշեց Սիմիդյանը:
Բնապահպան Հակոբ Սանասարյանի կարծիքով՝ Սևանի խնդիրը շատ պարզ է:
«Երկար տարիներ կեղծավորություն են անում՝ ասելով, որ Սևանի մակարդակը պետք է բարձրանա, բայց իրականում չեն բարձրացնում: Կտեսնեք, որ այս տարի նախարարը Սևանա լճից ավելի շատ է ջուր բաց թողնելու: Սևանում առկա խնդիրների դեմ պայքարելու համար ջրի մակարդակը պետք է բարձրանա, ու ամեն հարց կլուծվի, սակայն իրենք դա չեն անում: Գնում ես այնտեղ՝ ասֆալտապատ փողոցներ, բարձրահարկ շենքեր են, այնինչ անգամ բահ իրավունք չունեն հողի մեջ մտցնել, քանի որ հատուկ պահպանվող տարածք է»,- 168.am-ի հետ զրույցում նշեց բնապահպանը:
Հավելենք, որ արդեն մի քանի տարի է՝ Սևանա լիճը բացասական հաշվեկշիռ է գրանցում։ 2020թ․ տարեվերջին լճի մակարդակը կազմել է 1900.52 մ, 2021թ․ տարեվերջին՝ 1900.43 մ, 2022թ․ տարեվերջին՝ 1900․28 մ։
2023թ. տարեսկզբից մինչև մայիսի 24-ը 1900․28 մ նիշից լճի մակարդակը բարձրացել է մինչև 1900․45 մ, սակայն 20 սմ-ով դեռ ցածր է նախորդ տարվա նույն օրվա նիշից։ Լճից արդեն իսկ իրականացվել է 17,617 միլիոն խմ ջրառ, Արփա-Սևան ջրատարով լիճ է ներհոսել 50,710 միլիոն խմ ջուր՝ համաձայն ՀՀ շրջակա միջավայրի նախարարության «Հիդրոօդերևութաբանության և մոնիտորինգի կենտրոն» ՊՈԱԿ-ի տվյալների։
ՀՀ ջրային օրենսգրքի համաձայն՝ սակավաջրությունը իրավիճակ է, որի արդյունքում վատթարանում են ջրային ռեսուրսների պահանջարկի ապահովման պայմանները: Այն սահմանվում է՝ հիմք ընդունելով տվյալ հիդրոլոգիական տարում մթնոլորտային տեղումների քանակը, ձմռան ամիսներին կուտակված ձյան պաշարը, օդի ջերմաստիճանը, և երբ ըստ բազմամյա դիտարկումների տվյալների՝ գետավազանների համապատասխան ժամանակահատվածի ջրի միջին ելքերի ապահովվածությունը գերազանցում է 66,7 տոկոսը:
Մասնագետների խոսքով՝ Հայաստանի Հանրապետության ողջ տարածքում սակավաջրության մասին հայտարարելու համար ՀՀ ջրային օրենսգրքի 92-րդ հոդվածի համաձայն՝ ՀՀ կառավարությունը պետք է ընդունի համապատասխան որոշում, որը պետք է ներառի միջոցառումներ ջրային ռեսուրսների հետ կապված գործողությունների սահմանափակման, սակավաջրության տարածքներում ջրային ռեսուրսների օգտագործման չափավորման կամ սահմանափակման վերաբերյալ։ 2023թ․ դրությամբ ՀՀ կառավարությունը նման որոշում դեռ չի կայացրել։
