Առաջնային շուկայում գները դեպի վերև են բարձրանում երեք տարբեր գործոններով պայմանավորված. Արմեն Սաքապետոյան
2022 թվականի երրորդ եռամսյակում անշարժ գույքի առքուվաճառքի նվազումը, ըստ «Կառուցապատողների հայկական ասոցիացիա» ՀԿ խորհրդի անդամ Արմեն Սաքապետոյանի, պայմանավորված է սեպտեմբերյան դեպքերով:
«Մասնավորապես առաջնային շուկայում մոտավորապես մինչև հոկտեմբերի վերջ պասիվացել էր ու դրանից հետո որոշակի վերաակտիվացում տեղի ունեցավ»,- հավելեց նա:
Հիշեցնենք՝ Անշարժ գույքի կադաստրի կոմիտեի հրապարակած շուկայի վերլուծության համաձայն՝ ընթացիկ տարվա երրորդ եռամսյակում նվազել են առքուվաճառքի և օտարման գործարքները: 2022 թ. հուլիս-սեպտեմբեր ամիսներին Հայաստանում իրականացվել է առք ու վաճառքի 12.715 գործարք, ինչը վերջին 4 տարիների ամենացածր ցուցանիշն է. համեմատության համար նշենք, որ 2021թ. նույն ժամանակահատվածում իրականացվել էր առք ու վաճառքի 14.967 գործարք, 2020թ.՝ 15.301, իսկ 2019թ. երրորդ եռամսյակում՝ 13.144:
Չնայած արձանագրված պասիվացմանը՝ անշարժ գույքի գների նվազում չի արձանագրվել և չի կանխատեսվում: Դարձյալ ըստ կոմիտեի վերլուծության, Երևանի կենտրոն վարչական շրջանում անշարժ գույքի մեկ քառակուսի մետրի միջին շուկայական գինը 2022-ի հոկտեմբերին 760500 դրամ է կազմել: Նախորդ տարվա նույն ժամանակաշրջանի համեմատ աճը 14.4% է, 2021-ի հոկտեմբերին արժեքը 665 հազար դրամ է եղել։ Իսկ այս տարվա սեպտեմբերի նկատմամբ աճը կազմել է 1.4%, անշարժ գույքի միջին շուկայական գները Երևանի կենտրոնում մեկ քառակուսի մետրի համար եղել են 750 հազար դրամ։
Արմեն Սաքապետոյանը թվարկեց պատճառները, որոնք ազդում են շուկայում գնաճի պահպանման միտումների վրա:
«Առաջնային շուկայում գները դեպի վերև են բարձրանում երեք տարբեր գործոններով պայմանավորված:
Մեկը՝ ՌԴ-ից ներհոսքի արդյունքում վարձակալության բնակարանների պահանջարկի և վարձակալության գների բարձրացումն է, որն իր հերթին բերում է բնակարանների գների բարձրացման, որովհետև հետգնողունակությունը բարձրանում է: Այսինքն՝ եթե նախկինում մի բնակարանը տարեկան 3000 դոլար եկամուտ էր բերում, այսօր այդ նույն բնակարանը բերում է 5000-6000-ի եկամուտ, հետևաբար, դրան համապատասխան էլ գները բարձրանում են, որովհետև անշարժ գույքի հետգնողունակությունը տատանվում է 8-12 տարվա մեջ:
Մյուսը՝ արտարժույթի ցածր լինելն է. եթե մենք դոլարով ենք արտահայտում, ապա եթե նախկինում 1000 դոլարը համարժեք էր 480 հազար դրամի, այսօր արդեն այդ նույն գույքը դոլարով գնանշման դեպքում արժե 1200 դոլար: Իսկ 480 հազարանոցն էլ՝ այժմ բարձրացել-դարձել է 530-550 հազար դրամ. մոտավորապես 15 տոկոս դրամով արտահայտված գնաճ ունենք: Վերջինն էլ պայմանավորված է արդեն շինարարության աշխատանքների և շինարարության մեջ օգտագործվող ապրանքների գնի բարձրացմամբ՝ առաջին հերթին ցեմենտի գնի բարձրացմամբ: Այժմ ցեմենտի գինը 50 հազար դրամ է դարձել արդեն»:
