«Մինչև այսօր չի տրվել հարցի պատասխանը՝ արդյո՞ք Պեմզաշենի ողբերգությունը կարող էր լինել ահաբեկչություն». Կարապետ Պողոսյան
«Դեռևս չեմ ուզում շատ բան խոսել: Փորձում ենք հնարավորինս հասկանալ, թե ինչ էր տեղի ունեցածը: Քանի որ նախաքննությունը դեռևս շարունակվում է, չեմ ուզում որևէ կերպ խանգարել իրավապահներին»,- 168.am-ի «Ռեվյու» հաղորդաշարի հերթական թողարկման ընթացքում ասաց գյումրեցի իրավապաշտպան, ընդդիմադիր հասարակական գործիչ Կարապետ Պողոսյանը՝ անդրադառնալով Պեմզաշենի՝ նոյեմբերի 9-ին տեղի ունեցած մոր ու երկու զավակների ահազարհուր սպանության դեպքին:
Պեմզաշենի ողբերգությունը համեմատելով Ավետիսյանների ընտանիքի՝ տարիներ առաջ Գյումրիում կատարված սպանության դեպքի հետ՝ Կարապետ Պողոսյանն ասաց՝ Պեմզաշենի դեպքն աչքի էր ընկնում իր դաժանությամբ. այս սպանությունն ավելի շատ նման էր ծիսական սպանության:
«Ավետիսյանների սպանության ժամանակ տվյալ ժամանակի իշխանությունն ուներ քաղաքական կամք, որ անկեղծ լիներ հասարակության հետ: Նույնիսկ այն պահին, երբ Պերմյակովը դեռևս չէր հայտնաբերվել, և կարող էր Գյումրիի ու հարակից գյուղերի համար վտանգ ներկայացնել, ոչինչ չէր թաքցվում: Ասում էին, որ փնտրում են, զգույշ եղեք, տանը եղեք, լուսանկարն էին տարածել, ասում էին՝ եթե կտեսնեք, ահազանգեք: Ինչ-որ տեղ նաև հասարակությանն էին ներգրավում պրոցեսի մեջ, իսկ այստեղ ամեն ինչ փորձում են թաքցնել, և մինչև այսօր չի տրվել հարցի պատասխանը՝ արդյո՞ք դա կարող էր լինել ահաբեկչություն»,- ասաց Կարապետ Պողոսյանը:
Նրա խոսքով՝ թե Գյումրիում, թե Պեմզաշենում և առհասարակ Հայաստանում ամենաշատը խոսում են ահաբեկչության վարկածի մասին՝ հաշվի առնելով ծիսական սպանության ձևը, «նոյեմբերի 9-ի» ամսաթվի գործոնը և, ամենակարևորը, այն գիտակցությունը, թե ովքեր են մեր հարևաններն ու ինչի են ընդունակ:
«Ինձ թվում է, որ այստեղ էլ կան հստակ քաղաքական միտումներ, և երկրի բարձրագույն իշխանությունը հաստատ կվախենա և ահաբեկչության մասին բարձրաձայնելուց, և ամենակարևորը, թուրքական կամ ադրբեջանական ծագում ունեցող ահաբեկիչներից»,- ասաց իրավապաշտպանը:
Ըստ նրա՝ վերջին տարիներին ՀՀ իշխանությունն այնքան շատ մահեր բերեց, որ այսօր մահը դարձել է շատ սովորական բան:
«Ես չէի ասի, որ շատ վախեցած են: Նույն Պերմյակովի ժամանակ մարդիկ ավելի զգույշ էին, հետո ունեին վստահություն ու պահանջ իշխանությունից: Չմոռանանք, որ մի քանի օր շարունակ ժողովուրդը փողոցներում էր: Վերջում արդեն որոշակի քաղաքական շրջանակներ տարան անկարգությունների»,- ասաց Կարապետ Պողոսյանը:
Իրապաշտպանն անդրադարձավ նաև Պարեկային ծառայությանը, այդ ծառայության խնդիրներին, նկատեց, որ մտահոգիչ է, երբ ցածր կրթական ցենզ ունեցող մարդիկ են դառնում պարեկներ, նշեց, թե նախկինում ճանապարհային ոստիկան աշխատելու համար ինչ բարդ ճանապարհ էր պետք անցնել:
«Այսօր պարեկ դառնում են մարդիկ, ովքեր ունեն զենք, չգիտեն զենքի հետ վարվելու ձևը, չունեն կրթություն»,- ասաց իրավապաշտպանը:
Նա հիշեցրեց դեպքեր, երբ պարեկների կողմից կիրառվել են հատուկ միջոցներ՝ այդպես էլ չհիմնավորելով դրանց կիրառման անհրաժեշտությունը:
«Գյումրիում եղավ դեպք, երբ պարեկը փորձեց հատուկ միջոց կիրառել և արդյունքում՝ գազը լցրեց իր գործընկերոջ աչքերին»,- ասաց նա:
Կարապետ Պողոսյանը վստահ է՝ պարեկներն ըստ անհրաժեշտության Նիկոլ Փաշինյանին պետք են գալու ժողովրդական ցասումը ճնշելու ժամանակ:
«Նիկոլի իշխանությունը, որ ամեն ինչից վախենում է, մի բան շատ լավ է հասկանում, որ եթե ներքին զորքերը վաղը-մյուս օրը պետք է նորից հանի ժողովրդի դեմ և ինչ-որ միջոց կիրառի, դրա համար պետք է հրաման ու այդ հրամանի համար՝ պատասխանատվություն: Բայց այդ պարեկների համար ինքը ոչ մի պատասխանատվություն չի կրելու»,- ասաց նա:
Մանրամասները՝ տեսանյութում
