Ռազմական գործողություններից շուրջ 40 օր անց իշխանությունը գաղտնի է պահում զոհվածների ամբողջական անվանացանկը
Թշնամու կողմից սանձազերծված ռազմական վերջին ագրեսիայից շուրջ 40 օր է անցել, սակայն պաշտպանության նախարարությունը դեռ չի հրապարակում զոհված զինծառայողների անվանացանկը։
Պաշտոնական տվյալներով՝ սեպտեմբերի 13-ին տեղի ունեցած ռազմական գործողությունների հետևանքով հայկական կողմն ունի 207 զոհ և անհետ կորած, թշնամու սադրանքի հետևանքով ևս 3 զինծառայող զոհվել է սեպտեմբերի 18-ին։
168.am-ը ՊՆ մամուլի քարտուղար Արամ Թորոսյանից դեռ սեպտեմբերի 15-ին էր հետաքրքրվել, թե ինչո՞ւ չեն հրապարակվում զոհված զինծառայողների անունները։ Ի պատասխան՝ ՊՆ խոսնակն ասել էր․
«Այս պահին նույնականացման որոշակի աշխատանքներ են կատարվում, երբ ճշգրտված ցուցակներ կլինեն, այդ ժամանակ ՊՆ-ն կհրապարակի դրանք»։
Մարդու իրավունքների պաշտպան Քրիստիննե Գրիգորյանը երեկ՝ հոկտեմբերի 20-ին, լրագրողների հետ ճեպազրույցում անդրադառնալով զոհված և անհետ կորած համարվող զինծառայողների մասին հարցին՝ նշել էր, որ անհետ կորածների թիվը 29 է, իսկ զոհվածների մասին ՄԻՊ-ն ասել էր, որ 201 մարմին է նույնականացվել, և, որ ռազմական վերջին գործողությունների հետևանքով չնույնականացված մարմիններ չկան։
Հարց է առաջանում, եթե չնույնականացված մարմիններ չկան, ապա ինչո՞ւ մինչ այս պահը չեն հրապարակվում զոհված զինծառայողների անունները։
Այսօր այս հարցի պատասխանը 168.am-ը փորձեց ստանալ ՊՆ մամուլի քարտուղար Արամ Թորոսյանից։
«Ինչպես հայտնեց վարչապետը՝ անվանացուցակը կհրապարակվի գործող կարգի համաձայն, ինստիտուցիոնալ մեխանիզմով՝ «Զինծառայողների ապահովագրության» հիմնադրամում։ Այս պահի դրությամբ միայն այսքանը կարող եմ հայտնել»,- ասաց Թորոսյանը։
Ճշտող հարցին՝ նույնականացումն ավարտվե՞լ է, թե՞ դեռ ճշգրտումների կարիք կա, քանի որ նախորդ զրույցում նշել էիք, որ նույնականացման գործընթաց է տարվում և, երբ ճշգրտված ցուցակներ կլինեն, այդ ժամանակ ՊՆ-ն կհրապարակի դրանք, ՊՆ խոսնակն այսպես արձագանքեց․
«Երբ լիարժեք տեղեկատվությունը կփոխանցվի «Զինծառայողների ապահովագրության» հիմնադրամին, այնտեղ կզետեղվի անվանացուցակը, ինչպես հայտնեց վարչապետը»։
Հիշեցնենք, որ Նիկոլ Փաշինյանը սեպտեմբերի 30-ի առցանց ասուլիսի ժամանակ անդրադառնալով թշնամու կողմից սանձազերծված վերջին ռազմական գործողությունների հետևանքով զոհված զինծառայողների անունները չհրապարակելուն՝ ասել էր, թե ամբողջական ցանկը չհրապարակելը չի նշանակում, որ դա գաղտնի է պահվում․
«Հաշվի առնելով 44-օրյա պատերազմի փորձը, մենք եկել ենք եզրակացության, որ զոհվածների, մեր նահատակների անուններն ինստիտուցիոնալ նախատեսված մեխանիզմով հրապարակել։ Դա «Զինծառայողների ապահովագրության» հիմնադրամում արձանագրվող ցուցակն է, և անունները հրապարակվում են այնտեղ։ 44-օրյա պատերազմի զոհերի ամբողջական անունները նույնպես հրապարակվել է այնտեղ, և մենք կարծում ենք՝ այդպես պետք է լինի ինստիտուցիոնալ մոտեցումը։ Զոհերի ամբողջական ցանկը չհրապարակելը չի նշանակում, որ գաղտնի է պահվում դա․․․»։
Այս երկարաշունչ ու անբովանդակ տեքստն ասելու փոխարեն՝ գուցե ՊՆ–ն, ի վերջո, հրապարակի՞ զոհված զինծառայողների անունները, գոնե հանուն նրա, որ նահատակված տղաներին ոչ թե «Զինծառայողների ապահովագրության» հիմնադրամն է տարել ծառայության, այլ ՊՆ–ն։ Կամ՝ նաև ՊՆ-ն։
Եվ հենց այս պարզագույն հարցերն են նաև, որ հաստատում են այն խոսակցությունները, որ իրականում այսկերպ իշխանությունները ցանկանում են թաքցնել իրական զոհերի թիվը։
