Երևանի կենտրոնում օդի աղտոտվածությունն ամենաբարձրն է
Երևանի Կենտրոն վարչական շրջանում օդի աղտոտվածությունն ամենաբարձրն է։ Այսօր մամուլի ասուլիսի ժամանակ ՀՀ շրջակա միջավայրի նախարարության «Հիդրոօդերևութաբանության և մոնիթորինգի կենտրոնի» ղեկավարի տեղակալ Գայանե Շահնազարյանը ներկայացրեց նոյեմբերին Երևանում իրականացված մոնիթորինգի արդյունքները։
Այսպես,
• Կենտրոն- նոյեմբերի 17-23-ն օդում փոշու կոնցենտրացիան սահմանային թույլատրելի կոնցենտրացիան գերազանցել է 1,4-4 անգամ, իսկ նոյեմբերի 17-19-ը՝ ազոտի երկօքսիդը՝ 1,4-1,6 անգամ
• Արաբկիր-փոշու կոնցենտրացիան նույն ժամանակահատվածում նորման գերազանցել է 1,1 – 1,6 անգամ, ազոտի երկօքսիդը՝ նոյեմբերի 17 – ին և 20-ին՝ 1,1 անգամ
• Շենգավիթ-միայն նոյեմբերի 25-ին փոշու կոնցենտրացիայի նորման գերազանցել է 1,2 անգամ, իսկ ազոտի երկօքսիդը՝ 1,3 անգամ
• Նոր Նորքում մոնիթորինգի օրերին օդում փոշու կոնցենտրացիան սահմանային թույլատրելի նորմա չի գերազանցել, իսկ ազոտի երկօքսիդը՝ նոյեմբերի 17-ին և 22-ին՝ 1,1 անգամ
Ծծմբի երկօքսիդն աճել է, սակայն Երևանի որևէ վարչական շրջանում այն չի գերազանցել թույլատրելի կոնցենտրացիան։
Հիշեցնենք, որ հոկտեմբերին Երևանի քաղաքապետ Տիգրան Ավինյանը նշել էր, թե օդի որակը ձմռանը նկատելիորեն վատանում է։ Դրա գլխավոր պատճառը, ըստ Ավինյանի, ոչ թե շինարարական փոշին է, այլ հրդեհները՝ ինչպես փոքր (օրինակ՝ բակերում տերևների այրումը), այնպես էլ խոշոր, այդ թվում՝ մայրաքաղաքից դուրս:
