«2018-ից ակտիվացած այդ լրտեսները քոնն են, քո ենթակաները, ծառայել են քո ղեկավարած կառույցներում. պատժի՛ր». Մովսես Հակոբյան

Օրերս ՀՀ ազգային անվտանգության ծառայությունը հերթական հաղորդագրությունը տարածեց այն մասին, որ բացահայտվել է զինծառայողի կողմից կատարված պետական դավաճանության ևս մեկ դեպք՝ կից հրապարակելով նաև տեսանյութ։

ՀՀ զինված ուժերի գլխավոր շտաբի նախկին պետ, գեներալ-գնդապետ Մովսես Հակոբյանի համոզմամբ՝ լրտեսների վերաբերյալ հաճախակի տարածվող հաղորդագրությունները վկայությունն են այն բանի, որ Ազգային անվտանգության ծառայությունն իր բուն գործով չի զբաղվում։

Ըստ Հակոբյանի՝ սրանից զատ պետք է ուշադրություն հրավիրել մեկ այլ՝ շատ կարևոր հանգամանքի վրա։

«Երկրի ղեկավարի վերադասը ժողովուրդն է, և, երբ նրանց ասում է, թե՝ ես ի՞նչ անեմ, որ լրտեսներ կան, սխալ է, նման բան չպետք է հնչեցնել, որովհետև այդ լրտեսները քոնն են, քո ենթակաները, որոնք քեզ ընտրել են ու ծառայել քո ղեկավարած կառույցներում, հետևաբար՝ պարզի՛ր և պատժի՛ր։

Ինչ վերաբերում է լրտեսների շատությանը, ապա այստեղ հարց եմ ուզում տալ Ազգային անվտանգության ծառայությանը՝ իսկ վերլուծե՞լ եք, թե այդ ո՞ր թվականից է սկսել ՀՀ-ում գործել լրտեսական ցանց ու ինֆորմացիա տրամադրել Ադրբեջանին. դա արվել է 2018 թվականից հետո, ուստի հենց այստեղից պետք է անել հետևություններ ու հասկանալ, թե ինչո՞ւ նման բան եղավ։

Ես վերլուծության և գնահատականի արժանի հարց եմ բարձրացնում»,- ասաց Մովսես Հակոբյանը՝ ներկայացնելով նաև 2018 թվականից հետո լրտեսական ցանցի ակտիվ գործունեության պատճառների վերաբերյալ իր դիտարկումները։

«Ես կարող եմ երկու բան ասել՝ կա՛մ դա պատճառ է նրա, որ Ազգային անվտանգության ծառայությունն իր գործը թողել ու զբաղվում է ուրիշ գործերով՝ կոռուպցիա, զիլ-զիբիլ, և իր հիմնական գործով՝ հակահետախուզությամբ, չի զբաղվում, կա՛մ պատճառ է նրա, որ իշխանությունն ասում է՝ բանակը թալանել ու բանակի հաշվին բիզնես են արել, ընդդիմությունն ասում է՝ 5 միլիարդով Արցախը վաճառել են, և այդ ինֆորմացիան հակառակորդը վերլուծում է և բաց թողնում մեր հասարակության մեջ, ասում են՝ նախկինները և ներկաները վաճառել են, ձեզ փայ չի հասել, հիմա եկեք, ձեզ փայ տանք։ Ես այստեղ ուզում եմ ասել, որ հակառակորդը վճարում է մեկ անգամ, հետո այդ ինֆորմացիան է դեմ տալիս ու ասում՝ եթե չշարունակես ինֆորմացիա տալ, դա կհայտնվի քո երկրի ԱԱԾ-ում, հետևապես, թող իմանան, որ լրտեսություն անելու համար հակառակորդը վճարում է մեկ անգամ՝ առաջին ինֆորմացիայի համար, հետո աշխատեցնում է առանց վճարելու»,- ասաց Մովսես Հակոբյանը։

Մանրամասները՝ տեսանյութում