Որքան արժեն բնակարանները Երևանում և մարզերում․ երկրորդային շուկայից բնակարանների ձեռքբերման պահանջարկը նվազել է

ՀՀ վիճակագրական կոմիտեի հրապարակած տվյալների համաձայն՝ 2021թ. ընթացքում Հայաստանում իրականացվել է անշարժ գույքի առուվաճառքի 56,044 գործարք, ինչը 2020թ. համադրելի ցուցանիշը գերազանցում է 21.42%-ով կամ 9885 գործարքով։ Մասնավորապես, Երևանում անշարժ գույքի իրականացված առուվաճառքի գործարքների թիվը կազմել է 17,602։

2020թ. համեմատ արձանագրվել է աճ 26.64%-ով կամ 3703 գործարքով։ Անշարժ գույքի առուվաճառքի գործարքների ընդհանուր թվի 31.41%-ն իրականացվել է Երևանում։ 2021թ. ընթացքում բնակարանների վաճառքի ծավալն աճել է 31.3%-ով կամ 3955-ով՝ կազմելով 16,590։ Բնակելի տների առուվաճառքի թիվն աճել է 17.51%-ով կամ 1249-ով և կազմել է 8382։

Ինչ վերաբերում է գներին, ապա Երևանի Կենտրոն վարչական շրջանում բնակարանների գները 1 քմ-ի համար նվազել են 1.83%-ով կամ 11,800 դրամով և կազմել 633,000 դրամ։

Արաբկիրում գներն աճել են 0.71%-ով կամ 3200 դրամով՝ կազմելով 455,200 դրամ։

Քանաքեռ-Զեյթունում գները նվազել են 0.3%-ով կամ 1000 դրամով և կազմել 327,500 դրամ։

Դավթաշենում գները նվազել են 2.86%-ով կամ 9600 դրամով և կազմել 325,600 դրամ։

Աջափնյակում գներն աճել են 0.38%-ով կամ 1200 դրամով և կազմել 314,800 դրամ։

Շենգավիթում գներն աճել են 2.23%-ով կամ 6700 դրամով և կազմել 306,700 դրամ։

Նոր Նորքում գներն աճել են 2.73%-ով կամ 8000 դրամով և կազմել են 301,500 դրամ։

Ավանում գներն աճել են 0.03%-ով կամ 100 դրամով և կազմել 295,700 դրամ։

Մալաթիա-Սեբաստիայում գներն աճել են 1%-ով կամ 2900 դրամով և կազմել 292,500 դրամ։

Էրեբունիում գներն աճել են 0.94%-ով կամ 2700 դրամով և կազմել 290,900 դրամ։

Նուբարաշենում գները նվազել են 1.64%-ով կամ 3000 դրամով և կազմել 180,100 դրամ։ Երևանից դուրս անշարժ գույքն ամենաթանկը Հրազդանում է՝ 294,700 դրամ, Աբովյանում՝ 204,300 դրամ, Վաղարշապատում՝ 168,800 դրամ, Աշտարակում՝ 141,100 դրամ, և Արտաշատում՝ 140,000 դրամ։

«Silver Rea» անշարժ գույքի գործակալության հիմնադիր–տնօրեն Անդրանիկ Հարությունովի փոխանցմամբ՝ երկրորդային շուկայից բնակարանների ձեռքբերման պահանջարկը մի քիչ նվազել է, ինչը չենք կարող ասել առաջնային շուկայի մասին:

«Երկրորդային շուկայում սովորաբար տարեկան ստաբիլ 2-3 տոկոս աճ է լինում: Ինչ վերաբերում է առաջնային շուկային, ապա դրանք նորակառույց շենքերն են, որոնք կառուցվում են, ու պահանջարկը շատ մեծ է, քանի որ գործում է նաև եկամտահարկի վերադարձի մասին օրենքը: Մարդիկ կան, որ այս պահին կենցաղի բարելավման խնդիր չունեն կամ 2-3-րդ բնակարանի խնդիր, բայց ունեն բարձր աշխատավարձ և ցանկանում են այդ օրենքից օգտվել, ու այդ շուկան շատ ակտիվ է: Իսկ հիմա, քանի որ «Եկամտահարկի վերադարձի մասին» օրենքը դուրս է գալիս փուլ առ փուլ, այն գործելու է մարզերում ու, երբ արդեն մարզերում պահանջարկ կլինի, կառուցապատում կսկսվի:

Նման պահանջարկ մարզերում ունենալու համար պետք է լիքը ենթակառուցվածքներ ստեղծեն: Ամենաակտիվը Կոտայքի մարզն է, քանի որ Երևանին մոտ է: Աբովյանում և դրա հարակից տարածքներում շատ գործարաններ, տարբեր ինֆրաստրուկտուրաներ կան: Այսինքն, գնորդին պետք է մոտիվացնող բան լինի: Օրինակ, եթե Վանաձորում նոր շենք կառուցենք, կարող է 50 հոգի ցանկանա գնել, բայց 2000 հոգանոցի պահանջարկ չունենք: Սակայն, եթե մի քանի գործարան կառուցեն Վանաձորում, համալսարաններ տեղափոխեն, տեխնոլոգիական կենտրոնները մասնաճյուղեր բացեն, բնականաբար, այնտեղ էլ բնակարանների կարիք կլինի: Դրա համար երկիրը պետք է համաչափ զարգացնենք, որպեսզի մնացած մարզերն էլ համաչափ զարգանան, կառուցապատման պահանջարկ լինի»,- 168.am-ի հետ զրույցում ասաց Անդրանիկ Հարությունովը:

Հիշեցնենք, որ ՀՀ 2021թ. օգոստոսի 12-ին տեղի ունեցած նիստում հաստատել է «Հարկային օրենսգրքում փոփոխություն կատարելու մասին» ՀՀ օրենքի նախագիծը:

Նախագծով առաջարկվում է Երևանի վարչական սահմաններում, ըստ գոտիականության և ըստ տարիների, աստիճա­նա­բար կրճատել հիպո­թեքային վարկի սպասարկ­­ման համար վարձու աշխատող հանդիսացող ֆիզի­կա­­կան անձի կող­մից վճարված տոկոս­ների գումար­­ների չափով եկամտային հարկի վերա­դարձ­ման համակարգի կիրառության շրջա­նակը։

Մասնավո­րա­պես, նախագծով առա­ջարկ­վում է սահ­մանել, որ եկամտային հարկի վերադարձման համա­կարգը կիրառելի չի լինելու՝

ա․ 2022 թվականի հուլիսի 1-ից հետո ստացված վարկերի մասով, եթե գույքը գտնվում է Երևան քաղաքի առա­ջին գոտում,

բ․ 2023 թվականի հունվարի 1-ից հետո ստացված վարկերի մասով, եթե գույքը գտնվում է Երևան քաղաքի երկրորդ գոտում,

գ․ 2023 թվականի հուլիսի 1-ից հետո ստացված վարկերի մասով, եթե գույքը գտնվում է Երևան քաղաքի երրորդ գոտում,

դ․ 2025 թվականի հունվարի 1-ից հետո ստացված վարկերի մասով, եթե գույքը գտնվում է Երևան քաղաքի այլ գոտիներում։

Բացի այդ, նախագծով առաջարկվում է նաև սահմանել, որ այս սահմանափակումները կիրառվելու են 2022թ․ հունվարի 1-ից հետո կայացված որոշումներով ստաց­ված շինարարական թույլ­տվու­­թյունների հիման վրա կառուցվող անհատական բնակելի տների և բազ­մա­բնա­կա­րան բնակելի շենքերի բնակարանների մասով։