Արցախում նախկին նախագահները փորձում են վերադառնա՞լ

Արցախի ներքաղաքական կյանքում կուլիսային կամ ոչ հրապարակավ ակտիվություն կա:

Ընդ որում, 168.am-ի տեղեկություններով՝ քաղաքական ակտիվություն են դրսևորում նաև Արցախի նախկին նախագահներ Արկադի Ղուկասյանը և Բակո Սահակյանը: Արդյոք այս ակտիվությունը կհանգեցնի՞ քաղաքական նոր ուժի ձևավորմանը, արցախյան մեր աղբյուրներն ասացին, որ դեռ հստակ որոշում չկա:

Արցախյան ներքաղաքական կյանքում փոփոխությունների նկատմամբ, մեղմ ասած, անտարբեր չէ նաև Արցախի ՊՆ նախկին հրամանատար Սամվել Բաբայանը, որն իր քաղաքական կոնսուլտացիաները վաղուց է սկսել, քանի որ կարծում է, որ հատկապես արցախյան վերջին պատերազմից հետո սահմանադրական բարեփոխումներն այլընտրանք չունեն։

Ինչ վերաբերում է Արցախի նախագահ Արայիկ Հարությունյանին, նրան մոտ կանգնած մեր աղբյուրներն ասացին, որ դեռ պարզ չէ՝ արդյո՞ք նա կհեռանա քաղաքականությունից սահմանադրական փոփոխություններից հետո, թե՞ ոչ:

Միաժամանակ, արցախյան աղբյուրները չեն բացառում, որ Արայիկ Հարությունյանը որոշի վերարտադրվել՝ Արցախի պետնախարար Արտակ Բեգլարյանին աջակցելով:

Իհարկե, այսօր վաղ է ինչ-որ բան հստակ ասել, քանի որ ամեն րոպե սցենարներ կարող են փոխվել, նաև՝ ուզենք թե չուզենք, ռուսական կողմի դիրքորոշումներն իրենց դերը խաղալու են:

Մի բան հստակ է՝ եթե Արցախի նախկին նախագահները նոր ուժ ստեղծեն, և նրանց շուրջը հավաքվեն իրենց մտերիմ գեներալները, և հակառակ ճամբարում լինի Սամվել Բաբայանը, ապա հիմնական պայքարը նրանց միջև է ընթանալու:

168.am-ը գրել էր՝ մամուլում տեղեկություններ էին շրջանառվել, որ Նիկոլ Փաշինյանը ցանկանում է Սամվել Բաբայանի միջոցով հասնել Արայիկ Հարությունյանի գահընկեցությանը:

Այսինքն, Նիկոլ Փաշինյանը համարում է, որ Արայիկ Հարությունյանն այլևս պետք չէ, քանի որ Արցախն արդեն դարձել է սակարկման առարկա, և փորձ է արվում, ըստ էության, թուրքերի և ադրբեջանցիների հետ բանակցություններում Արցախի հարցի սակարկման կամ առևտրի միջոցով այլ հարցերում ստանալ իր համար որոշակի բարենպաստ արդյունք:

Այս տրամաբանության շրջանակում Նիկոլ Փաշինյանը, մեզ հասած տեղեկություներով, Արցախ է գործուղել Սամվել Բաբայանին, որը թեև որպես Արցախում սահմանադրական բարեփոխումների ջատագով է գնացել, սակայն նպատակը նաև հիշատակվածն է եղել:

Ռուսական կողմը, մեր տեղեկություններով՝ չի ողջունել Նիկոլ Փաշինյան-Սամվել Բաբայան այս «օպերացիան», ավելին, անուղղակի ձևով հասկացրել են, որ անհրաժեշտության դեպքում կտրուկ միջոցների կդիմեն:

Մյուս կողմից՝ պետք է արձանագրել, որ Սամվել Բաբայանը թեպետ շատ ակտիվ է, բայց այսօր նա Արցախում չունի գոնե այն որոշակի հեղինակությունը, որն ուներ գոնե իր համակիրների շրջանում 2020թ. ընտրություններից հետո, այն 44-օրյա պատերազմից հետո անկում է ապրում:

Նշենք, որ Արցախի Հանրապետության նախագահ Արայիկ Հարությունյանը հունվարի 18-ին հանդիպել էր մի շարք հասարակական կազմակերպությունների ներկայացուցիչների հետ։

Հանդիպմանը նա հայտնել էր, որ առաջիկայում կստեղծվի համապատասխան աշխատանքային խումբ, որը հանրային քննարկումների առարկա կդարձնի սահմանադրական հնարավոր փոփոխությունների անհրաժեշտության հարցը:

Արայիկ Հարությունյանը շեշտել էր, որ հնարավոր սահմանադրական բարեփոխումները մշակվելու են բացառապես Արցախի Հանրապետության անկախության միջազգային ճանաչման և պետականության ամրապնդման անզիջում կուրսի շրջանակներում։

Արդեն հունվարի 19-ին հրավիրված աշխատանքային ընդլայնված խորհրդակցությանը՝ օրենսդիր և գործադիր մարմինների պատասխանատուների մասնակցությամբ, Արցախի ղեկավարն ասել էր, որ թեև ազգային կամ կոալիցիոն կառավարության վերաբերյալ որևէ բան չեն պայմանավորվել, բայց տարբեր ուժերի առաջարկություններն ընդունելու է։