Լա լիգան դեմ է Սուպերլիգային
Լա Լիգայի նախագահ Խավիեր Տեբասը խոսել է Սուպերլիգայի ստեղծմանը դեմ արտահայտվող ակումբների մասին:
– Իսպանական ակումբների մեծ մասը, այդ թվում՝ Մադրիդի «Ատլետիկոն», դեմ են Սուպերլիգային: Եթե դուք վերլուծում եք արդյունաբերությունը, ապա «Ռեալն» ու «Բարսելոնան» նույնպես պետք է դրան դեմ լինեն: Լա Լիգան բաղկացած է 42 ակումբներից (Պրիմերան և Սեգունդան), և միայն դա կարող է օրինական լինել: Դուք չեք կարող խաղալ Սուպերլիգայում և Լա Լիգայում: Մենք Սուպերլիգայի դեմ 40 ակումբ ունենք, և եթե «Ռեալն» ու «Բարսելոնան» լավ մտածեին, ապա նրանք նույնպես դեմ կլինեին:
– Շատ է խոսվում Սուպերլիգայի ստեղծման գործում անգլիական ակումբների դերի մասին …
– Մեծ վեցյակի մասին շատ է խոսվում, բայց այդ ամենը ոչ պաշտոնական է: Երբ սա պաշտոնապես հայտարարվի, որոշումը պետք է կայացնի անգլիական ակումբը: Ես կապեր ունեմ Պրեմիեր լիգայի բարձրակարգ ակումբների հետ, և նրանք դեմ են Սուպերլիգային: Նրանք ունեն աշխարհի լավագույն մրցաշարը, և եթե Պրեմիեր լիգայի մոդելն աշխատում է, Չեմպիոնների լիգայի մոդելն աշխատում է, ապա ինչո՞ւ ինչ-որ բան փոխել: Սա ռիսկ է: Դուք չեք կարող պատերազմել այս հայեցակարգի համար: Անգլիան ֆուտբոլի հիմնական ֆինանսական ուժն է, և նրանք չեն ցանկանում Սուպերլիգա:
Եթե ցանկանայի լինել Սուպերլիգայում, դուրս կգայի ու կհայտարարեի: Խնդիրն այն է, որ ամեն ինչ արվում է անաղմուկ, նրանք վստահ չեն, թե արդյո՞ք արժե ստեղծել այս մրցաշարը։
Հիշեցնենք, որ WikiLeaks- ի ֆուտբոլային տարբերակը՝ Football Leaks-ը, 2018 թվականին բացահայտել էր, որ մի շարք հայտնի ֆուտբոլային ակումբներ ցանկանում են դուրս գալ ՈՒԵՖԱ-ից և ստեղծել իրենց Սուպերլիգան: Ըստ նախագծի՝ 2021 թվականից Չեմպիոնների լիգան այլևս չի լինի: Դրա փոխարեն՝ Եվրոպայի առաջատար 11 ակումբները կանցկացնեն իրենց մրցաշարը: Նշվում է, որ նոր լիգայում կլինի 16 ակումբներ, որոնցից 11-ն առնվազն 20 տարի կմնան պայքարում և չեն լքի մրցաշարը: Եվս 5 ակումբներ կհրավիրվեն՝ որպես հյուր: 11 ակումբների թվում են այնպիսի գրանդ ակումբներ, ինչպիսիք են «Բավարիան», «Ռեալ Մադրիդը», «Բարսելոնան», «Մանչեսթեր Յունայթեդը», «Յուվենթուսը», «Արսենալը», ՊՍԺ-ն, «Չելսին», «Մանչեսթեր Սիթին», «Լիվերպուլը» և «Միլանը»:
Առաջին «հյուրերը» կլինեն «Ատլետիկոն», Դորտմունդի «Բորուսիան», «Ինտերը», «Մարսելը» և «Ռոման»:
Փաստաթղթի ստորագրումը պետք է լիներ 2018 թվականի նոյեմբերին:
Սիրարփի Աղաբաբյան
