«Արթուր Վանեցյանն է լինելու վարչապետ մեր հաղթանակի դեպքում». Բաբայանը՝ իշխանության հեռացմանը միտված քայլերի և ՏԻՄ ընտրություններին մասնակցելու մասին
«Հայրենիք» կուսակցությունն Արցախում հանդիումներ է ունեցել Արցախի խորհրդարանի քաղաքական ուժերի ներկայացուցիչների, հոգևոր դասի և «Ազատամարտիկների միության» անդամների հետ, այսինքն՝ նախատեսված բոլոր հանդիպումներն էլ տեղի են ունեցել, իսկ Արցախի նախագահ Արայիկ Հարությունյանի հետ հանդիպում ի սկզբանե նախատեսված չի էլ եղել։ 168 TV-ի «Ռեվյու» հաղորդաշարի եթերում ասաց «Հայրենիք» կուսակցության քաղխորհրդի անդամ Արսեն Բաբայանը։
«Մեր այցի նպատակն էր, որ հանդիպենք ոչ թե բարձրաստիճան պաշտոնյաների, այլ քաղաքական կուսակցությունների հետ։ Իմ տեղեկություններով՝ Արայիկ Հարությունյանի հետ հանդիպում նախատեսված չի էլ եղել, իսկ ինչ վերաբերում է Արցախի նախագահի մամուլի խոսնակի այն հայտարարությանը, թե Արայիկ Հարությունյանը չի ընդունում այն ուժերին, որոնք քննադատում են Նիկոլ Փաշինյանի իշխանությունը, ապա, նախ ուզում եմ հավատալ խոսնակի՝ այս հայտարարությունից հետո արած պնդմանը, թե դա իր անձնական կարծիքն է, և հետո հարց եմ հնչեցնում. ի՞նչ է դա նշանակում. չէ՞ որ ՀՀ քաղաքական ուժերի 98-99 տոկոսը քննադատում է Նիկոլ Փաշինյանին և նրա վարած քաղաքականությունը, հետևաբար՝ արդյո՞ք Արայիկ Հարությունյանը չի ընդունելու քննադատող այդ 89-90 տոկոս կազմող քաղաքական ուժերին, էլ չեմ խոսում, որ ՀՀ-ի այս իշխանությանը քննադատում է բնակչության և Արցախի բնակչության մի մասը։ Ես, անկեղծ ասած, ուզում եմ հավատալ, որ սա անհեռատես հայտարարություն էր ընդամենը, և ոչ ավելին»,- ասաց Արսեն Բաբայանը։
Անդրադառնալով այսօր կայքերից մեկում տեղադրված հրապարակմանը, թե այնուամենայնիվ կայացել է Արթուր Վանեցյան-Արայիկ Հարությունյան հանդիպումը, Արսեն Բաբաանը նշեց, որ ինքը չի մասնակցել նման հանդիպման։
Խոսելով «Հայենիք» կուսակցության Խորհրդի նախագահ Արթուր Վանեցյանի՝ Արցախը վերաբնակեցնելու մասին արված հայտարարության մասին՝ Բաբայանը նկատեց, որ ստեղծվելու է աշխատանքային խումբ, որը զբաղվելու է վերաբնակեցմանն առնչվող բոլոր հարցերով։
«Ինչ վերաբերում է միջոցների հայթայթմանը, ապա դա կարող է լինել և՛ պետության, և՛ մեր կուսակցության միջոցներով, ինչպես նաև դա կարող է լինել այլ միջոցների ներգրավմամբ։ Մեր գործընկերները կարող են լինել արտաքին ներդրողները, ուստի այս հարցը պետք է դիտարկել ՀՀ-Արցախ-Սփյուռք համագործակցության համատեքստում։ Ես չեմ կասկածում, որ պարոն Վանեցյանը կարող է ներդրումներ բերել։ Ամեն դեպքում, քանի դեռ ուսումնասիրություն չունենք, դժվար է նախաձեռնության վերջնական արդյունքի մասին խոսել։ Այն, որ պետության կողմից վերաբնակեցման խնդիրը դրվել է դեռ 1992 թվականից, դա դեռ չի նշանակում, որ հիմա դրան չի կարելի նոր թափ տալ, իսկ պարոն Վանեցյանի համար վերաբնակեցման հարցը առավել կարևոր է դարձել հատկապես բանակցային գործընթացում թույլ տրված սխալների հետևանքով «ադրբեջանական համայնքի» մասին խոսակցություններից հետո»,- ասաց Բաբայանը։
Ամփոփելով Արցախ կատարած այցը՝ Բաբայանն ընդգծեց՝ քանի որ իրենց կուսակցության առաջնային օրակարգն է՝ օր առաջ հեռացնել այս Կառավարությանը, ուստի, ինչպես Արցախ կատարած այցը, այնպես էլ իրենց մյուս գործողությունները պետք է դիտարկել այս առաջնահերթության համատեքստում։
Ինչ վերաբերում է այդ առաջնահերթությանը հասնելուն միտված ռազմավարական քայլերին՝ ապա Բաբայանը նախ շեշտեց, որ Փաշինյանի կառավարության ամեն օրը ՀՀ-ն հասցնում է շատ ավելի դժվարին վիճակի, ուստի իրենց և՛ մարզային գրասենյակների բացումը, և՛ ամենօրյա ռեժիմով քաղաքացիների խնդիրների հաշվառումն իրենց ռազմավարության մասն են կազմում, և, ի վերջո, բերելու է իշխանությունների փոփոխության։
«Մենք երբեք չենք ասել, որ վաղն իրականացնելու ենք հանրահավաք, բայց չենք ասում, որ վաղը չենք իրականացնի հանրահավաք։ Գործող իշխանությանը հեռացնելու մեր գործողությունները տեղի են ունենում՝ ինչպես մեր մարզային կառույցների բացումով, այնպես էլ՝ բոլոր տեղական ինքնակառավարման մարմինների ընտրություններին մեր մասնացությամբ. գիտենք, որ հաջորդ տարի ՀՀ-ում տեղի կունենան ՏԻՄ ընտրություններ, և մենք դրանց կմասնակցենք՝ հաղթելու նպատակով։ Սա է այն գործողությունների շղթան, որը պետք է բերի այս իշխանության հեռացմանը։ Եթե Փաշինյանն ունի պետական մտածողություն, ապա առնվազն այն պատճառով, որ Ազգային ժողովում ունի նման մեծամասնություն, օր առաջ պետք է հրաժարական տա և նշանակի նոր արտահերթ ընտրություններ, որովհետև նման մեծամասնություն ունենալը՝ 70 և ավելի տոկոս, ազգային անվտանգության խնդիր է ստեղծում, որովհետև կարող է անել ամեն ինչ, բացի այդ, տեսել ենք արդեն, որ չեն էլ կանգնում վատագույնն անելուց առաջ։ Լավագույնն այն է, որ իրենք հասկանան, ինքնակամ հեռանան, հասկանան, որ դրանով կփրկեն պետությունը, իսկ եթե չհեռանան, ապա դա կպարտադրի ընդդիմությունը, քանի որ այդ ժամանակ պատասխանատվությունն ընդդիմությանն է լինելու։ Պետք է հասնել ազգային համաձայնության կառավարության ձևավորման, որից հետո նոր պետք է խոսել առաջնորդի մասին։ Իհա՛րկե, մեր քաղաքական ուժի համար Արթուր Վանեցյանն է լինելու ՀՀ վարչապետը՝ մեր հաղթանակի դեպքում»,- ասաց Բաբայանը։
Հարցազրույցի մանրամասները՝ տեսանյութում
