Մեր տեղը համավարակի ցուցակներում
Համավարակ. ընդհանուր թվեր
Համավարակի համաշխարհային թվերը «նահանջում են»: Ի տարբերություն մեր ցուցանիշների: 2 մլն 962.000 բնակչությամբ Հայաստանն աշխարհի երկրների ցանկում 138-րդն է: 3.3 մլն-անոց Մոնղոլիայից հետո և 2.9 մլն-անոց Ալբանիայից առաջ: Կորոնավիրուսի հետևանքների վիճակագրությունը շատ արագ է փոփոխվում, բայց արդեն ընդհանուր տենդենցներ հստակ արձանագրվել են: Նույնիսկ ամենօրյա տվյալների հրապարակման հետևանքով վիճակագրական փոփոխությունների շարժերն են հստակեցվել:
Համավարակի օրերին կորոնավիրուսով վարակվածների քանակով (14․268 դեպք) մեր երկիրը 51-րդն է (հունիսի 10-ի տվյալներով): Մեզանից առաջ Իրաքն է` 40,2 մլն բնակչությամբ: Իսկ անմիջապես հետո` 207 մլն-անոց Նիգերիան է:
Հունիսի 10-ին մեր «դիրքը» զգալիորեն բարելավվեց: Հիմա մեր երկիրն առողջացածների (5226 մարդ) թվաքանակով 55-րդն է:
5,5 մլն բնակչություն ունեցող Ֆինլանդիայից հետո և 110 մլն-անոց Ֆիլիպիններից առաջ: Առողջացածների այսօրվա մեծ քանակի մասին նույնիսկ պատկան ոլորտի նախարարն էր հասցրել իրազեկել բոլորիս: Կորոնավիրուսից արձանագրված մահացությունների դեպքերով Հայաստանը 60-րդն է` 5.5 մլն-անոց Նորվեգիայի և 26.5 մլն-անոց Կամերունի արանքում:
Համավարակ. օրվա թվերը
Հունիսի 10-ին արձանագրված հիվանդացածների քանակով (428 մարդ) Հայաստանը 60-րդ երկիրն է: Մեզանից առաջ վարակվածների թվով Սինգապուրն է (իր մոտ 6 մլն բնակչությամբ): Հետո` Կանադան է` 26.5 մլն բնակչություն: Օրվա արձանագրված մահերի քանակով ցանկի 13-րդ տեղում ենք:
Մեզանից առաջ Ֆիլիպիններն է (բնակչությունը 110 մլն): Մեզանից ներքև` Հոնդուրասը (բնակչությունը 10 մլն): Մահերի քանակի վիճակագրությունն էլ ապացուցում է, որ աշխարհի երկրների մեծ մասում համավարակի տեմպը լրջորեն թուլացել է: Ակտիվ հիվանդների քանակով մեր երկիրը 36-րդն է (8 650 հիվանդ): 35-րդ տեղում է Նիգերիան (բնակչությունը՝ 207 մլն): 37-րդն Իրաքն է (42.5 մլն բնակչություն):
Համավարակ. տարօրինակ, թերի, բայց պիտանի վիճակագրություն
Համավարակի վիճակագրությունը հաշվարկվում է նաև 1 մլն բնակչի «բաժնեմասի» հարաբերությամբ: Օրինակ, 1 մլն բնակչի հաշվարկով վարակվածների ցանկում մեր երկիրը 19-րդն է: Յուրաքանչյուր 1 մլն բնակչից վարակվել-հիվանդացել է 4 760-ը: Մեզանից առաջ 5 մլն բնակիչ ունեցող Իռլանդիան է: Իսկ անմիջապես հետո՝ 10 մլն-անոց Շվեդիան: 1 մլն բնակչի հաշվով կորոնավիրուսի պատճառով գրանցված մահերի քանակը մեր երկրում 77 է: Այս ցուցանիշ-ցանկի 34-րդ երկիրն ենք: 33-րդ տեղում Սան Մարինոն է` 39.000 բնակչությամբ: 35-րդը` Ավստրիան է (9 մլն բնակչություն): Կոնկրետ Սան Մարինոյի օրինակը ցույց է տալիս, որ այս ցանկում հայտնված գաճաճ` 1 մլն-ից պակաս պետությունների «պատճառով» ցանկը դառնում է հարաբերական: Բայց այս թերությունով հանդերձ՝ այն հնարավորություն է տալիս բավականին օբյեկտիվ պատկեր տեսնել:
Համավարակ. թեստեր
Համավարակի տարածվածության հաշվարկի ամենաճշգրիտ մեթոդներից է թեստերի թվի հարաբերությունը հայտնաբերվող վարակակիրների ընդհանուր թվին: 24 երկրներ իրենց անցկացրած թեստերի քանակը չեն հրապարակել (և չեն հրապարակում): Այդ երկրների ցանկում են, օրինակ, 44 մլն-անոց Ալժիրը, 60 մլն-անոց Տանզանիան: Իսկ այն, որ այդ 24 երկրների ցանկում է 1.3 մլրդ-անոց Չինաստանը, միանգամից ապացուցում է, որ այս ցուցանիշի գծով համաշխարհային ամբողջական վիճակագրություն չի կարող լինել: Բայց շատ երկրներ այս վիճակագրությունը կարևորելով՝ վարում են նման վիճակագրություն:
Հայտնի է, որ ամենաշատ թեստեր արվել են ԱՄՆ-ում (մոտ 22.1 մլն): Թեստերի քանակով 2-րդը Ռուսաստանն է (13.5 մլն), ապա՝ Մեծ Բրիտանիան (մոտ 5.9 մլն): Մեկ մլն-ի հաշվարկով այս երկրներն այլ «դասավորություն» ունեն: Առաջինը Ռուսաստանն է (մոտ 92.8 հազար թեստ), երկրորդը՝ Մեծ Բրիտանիան (մոտ 86.5 հազար), ապա ԱՄՆ-ը (մոտ 67 հազար): Մենք թեստերի բացարձակ քանակով 91-րդ երկիրն ենք` 73156: Իսկ մեկ մլն բնակչի հաշվարկով՝ 67-րդը` 24690 թեստ:
Թեստերի քանակի համադրումը հայտնաբերված վարակակիրների քանակի հետ նաև կարող է մատնանշել համավարակի մեղմումը կամ տարածումը: Մի քանի օր առաջ օրվա թեստերի մոտ 38.5 տոկոսը դրական էր: Կարելի էր ենթադրել, որ դա համավարակի պիկն էր: Հունիսի 10-ին թեստերի 24,47 տոկոսն է դրական եղել: Կարելի է ենթադրել, որ համավարակը մեղմվում է: Եթե այս տենդենցը պահպանվի: Որովհետև այն առայժմ ավելի բարձր է, քան արձանագրված միջին թիվը: Մեր երկրում դրական արդյունք արձանագրվել է թեստերի 19.28 տոկոսի դեպքում:
