Խորհրդական ունենալն ինքնանպատակ չէ և բխում է մեր այսօրվա կարիքներից. Մխիթար Հայրապետյան
«Բարգավաճ Հայաստան» խմբակցության պատգամավոր Սերգեյ Բագրատյանը և իշխանական մի քանի պատգամավոր՝ Մխիթար Հայրապետյանը, Արտակ Մանուկյանը, Համազասպ Դանիելյանը, Վլադիմիր Վարդանյանը և Արթուր Դավթյանը, հեղինակել և Պետաիրավական հարցերի մշտական հանձնաժողովին են ներկայացրել նախագիծ՝ «Ազգային ժողովի կանոնակարգ» սահմանադրական օրենքում, «Հանրային ծառայության մասին» ՀՀ օրենքում և հարակից մի շարք օրենքներում փոփոխություններ և լրացումներ կատարելու վերաբերյալ:
Մխիթար Հայրապետյանի ներկայացմամբ՝ առաջարկվող մի շարք փոփոխությունների հետ, նախատեսում են, որ խմբակցության ղեկավարները և մշտական հանձնաժողովների նախագահներն ունենան խորհրդականներ:
Ըստ նրա՝ խորհրդականի ինստիտուտի ներդնումն ուղղված է մշտական հանձնաժողովների և խմբակցությունների կողմից կատարվող աշխատանքների և կայացվող որոշումների արդյունավետության բարձրացմանը: Խորհրդականի աշխատավարձը սահմանվում է վեց գործակցով, ինչը հնարավորություն կտա աշխատաշուկայից ներգրավել առավել արհեստավարժ մասնագետի:
Այս ամենից զատ, օրենքի նախագիծը նախատեսում է նաև հանձնաժողովի կազմում ընդգրկված փորձագետների թվի ավելացում, որոնց թիվը կարող է ավելանալ հանձնաժողովի նախագահի առաջարկությամբ՝ Խորհրդի որոշմամբ:
Նախագիծը ներկայացնելուց հետո «Իմ քայլը» խմբակցության պատգամավոր Արուսյակ Ջուլհակյանը Մխիթար Հայրապետյանից հետաքրքրվեց, թե նախագիծն ընդունելու դեպքում հանձնաժողովում մոտավորապես քանի՞ փորձագետ կարող է ավելանալ, և նրանց վճարումն ինչպե՞ս պետք է կատարվի:
Մխիթար Հայրապետյանը նկատեց, որ իր նշած դրույթն ըստ էության այսօր էլ է գործում, պարզապես լրացնող դրույթ են դրել, որը վերաբերում է խորհրդականների հատվածին:
«Այս պահի դրությամբ օրենսդրությամբ սահմանված նման սահմանափակում չկա: Պետք է ասեմ, որ 7-րդ գումարման ԱԺ-ի հենց առաջին ամսում մի քանի հանձնաժողովների նախագահներ հիմնավորեցին, թե ինչու, օրինակ, պետք է մեկ հաստիքով ավելանա, ԱԺ խորհուրդն այն ժամանակ այդ պահանջը հիմնականում բավարարեց: Եթե այս պահին Դուք որևէ առաջարկ ունեք, թե քանի հոգի պետք է լինի, կարող ենք քննարկել: Կարծում եմ՝ այս պահին ԱԺ խորհրդում արդեն կոնսենսուս կա թվաքանակի հետ կապված»,- նշեց Մխիթար Հայրապետյանը:
Արձագանքելով՝ Արուսյակ Ջուլհակյանն ասաց, որ թվաքանակի հետ կապված որևէ առաջարկ չունի, ուստի կարող են հարցը քննարկել մինչև նախագծի երկրորդ ընթերցումը:
«Կխնդրեմ ներկայացնենք, թե հանձնաժողովների նախագահների և խմբակցությունների ղեկավարների խորհրդականի գործառույթները որոնք են լինելու»,- հարցրեց Ա. Ջուլհակյանը:
Մխիթար Հայրապետյանն էլ պարզաբանեց, որ այդպիսով խորհրդականին քաղաքական գործընթացներին մասնակից դարձնելու հնարավորություն է տրվում, ավելին՝ նման հաստիք ունենալը բխում է ամբողջ օրենսդրությունից և Սահմանադրությունից:
«Այս պաշտոնն ինչ-որ առումով ենթադրում է քաղաքական խորհրդատվություն ու ծառայություն մատուցելը տվյալ կառույցի ղեկավարին»,- հավելեց Մխիթար Հայրապետյանը:
Միևնույն ժամանակ պատգամավորն ընդգծեց, որ, թեև խորհրդականի հաստիքը նաև ֆինանսական բեռ է ենթադրում, այդուհանդերձ, նրա կարծիքով՝ այդ ծախսն արդարացված է, որովհետև խորհրդարանական կառավարմամբ երկրում հանձնաժողովներում 4-5 փորձագետով անհնարին է արդյունավետ աշխատել մի քանի ոլորտների մասով:
«Սա ինքնանպատակ չէ, և այն բխում է մեր այսօրվա կարիքներից»,- ասաց «Իմ քայլը» խմբակցության անդամ Մխիթար Հայրապետյանը:
ԱԺ մշտական հանձնաժողովում քննարկված նախագծերի փաթեթը ստացավ դրական եզրակացություն:
