Անդրանիկ Քոչարյանը բողոքում է ֆեյքերից
ԱԺ «Իմ քայլը» խմբակցության պատգամավոր Անդրանիկ Քոչարյանն այսօր խորհրդարանական հայտարարությունների ժամին անդրադարձավ Հայաստանում ֆեյքերի գործունեությանը՝ ասելով, թե նրանք փորձում են ձևավորել կեղծ հանրային օրակարգ, որը որևէ աղերս չունի օրվա իշխանությունների հետ:
«Ֆեյքերի միջոցով տպագրում են հոդվածներ, ֆեյքերը դրանց արձագանքում են, իսկ նրանց սպասարկող մամուլն արտատպում և ձևավորում է հանրային ֆեյք կարծիք: Նրանք փորձում են վիրտուալ ձևավորել պսևդո ժողովրդավարություն, որտեղ մարդուն փոխարինում է կեղծիքը: Հայրենիքի և զինվորի գաղափարը տեղափոխվում է վիրտուալ՝ ոչ իրական դաշտ, որի արդյունքում ունենում ենք կեղծված արժեհամակարգ, ժողովրդավարության պայմաններում սա անթույլատրելի է, քանզի ժողովրդի կամքն առաջնային է երկրի բոլոր ծրագրերն իրականություն դարձնելու և ապագայի հեռանկարը կերտելու գործում: Իրական հայրենիքի, զինվորի կերպարին զուգահեռ՝ ծնվում է արհեստական իրողություն, որը չունի ամուր հիմքեր և կփլուզվի առաջին իսկ հարվածից»,- նշեց պատգամավորը:
Մեջբերելով մեծանուն գրող Հրանտ Մաթևոսյանի խոսքերը՝ «Զինվորի իմ բացակայությամբ հնէաբաններն իմ երկրի անցյալը հարմարեցնելու են իրենց ցեղերի ապագային, զինվորի իմ վստահ ներկայությունը ոչ է ասելու նրանց, ասելու է՝ հավերժորեն նորոգվելու են ազգերը: Զինվորի իմ ու քո ներկայությունն այսօրվա մեջ շատ է կարևոր, պարտադիր անհրաժեշտություն է», Անդրանիկ Քոչարյանը բոլորին մաղթեց առողջություն և եզրափակեց ելույթը:
