Բանանի մեջ առկա կարմիր գույնի գոյացությունները վնասակար չեն. Արցախի ՍԱՊԾ պետ
ԱՀ գյուղատնտեսության նախարարության սննդամթերքի անվտանգության պետական ծառայության (ՍԱՊԾ) բուսասանիտարիայի տեսչությունը բնակիչների կողմից բանանի մեջ կարմիր գույնի գոյացությունների առկայության վերաբերյալ ահազանգ է ստացել:
Այս մասին «Արցախպրես»-ի թղթակցի հետ զրույցում ասել է ՍԱՊԾ պետ Արթուր Ներսիսյանը:
Նրա խոսքով՝ իրականացնելով հերթական ստուգումները՝ պարզվել է, որ բանանի մեջ առկա կարմիր գույնի գոյացությունները կազմավորվում են Pseudomonas celebensis Gauman (1929) բակտերիայից որը, ընդհանարապես, մարդու օրգանիզմին վնաս չի պատճառում:
«Բույսի որևէ հիվանդություն մարդու առողջությանը սպառնալ չի կարող: Կրկին ուզում եմ տեղեկացնել մեր բնակչությանը, որ ԱՀ բանան է ներմուծվում հիմնականում Էկվադորից:
Սահմանային հսկիչ կետերում ներմուծվող յուրաքանչյուր ապրանքի, այդ թվում՝ բանանի մասով, իրականացվում է զննում, որից հետո գրվում է փորձագիտական եզրակացությունը: Սա խոսում է այն մասին, որ հնարավոր չէ մարդու առողջությանը վնասող որևէ մթերք ներկրել հանրապետության տարածք. բոլոր աշխատանքները վերահսկվում են պատկան մարմինների կողմից»,-տեղեկացրել է Ա. Ներսիսյանը՝ մեկ անգամ ևս հորդորելով բնակչությանը, որ խուճապի չմատնվեն բանանի մեջ առկա կարմիր գույնի գոյացություններից:
