Ցմահ ազատազրկման դատապարտված Աշոտ Մանուկյանն ազատ արձակվեց
Ցմահ ազատազրկման դատապարտված և 24 տարի բանտում անցկացրած Աշոտ Մանուկյանն այսօր Վերաքննիչ դատարանի դատավոր Մնացական Հարությունյանի որոշմամբ ազատ արձակվեց հենց դատարանի դահլիճից:
«Աշոտ Մանուկյանն արդեն ազատության մեջ է: Զբաղվում է իր անձնական հարցերով: Դատարանի դահլիճից է ազատ արձակվել Աշոտ Մանուկյանը, քանի որ նմանատիպ դատական ակտերը ուժի մեջ են մտնում հրապարակման պահից: Եթե դատարանը որոշեց ազատ արձակել նշված պատժից, ապա հենց այդ պահին պետք է ազատ արձակվի, ինչը և կատարվեց»,- 168.am-ի հետ զրույցում ասաց Աշոտ Մանուկյանի փաստաբաններից Միհրան Պողոսյանը:
Աշոտ Մանուկյանին երեք զինծառայողի սպանության համար նախ դատապարտել էին մահապատժի, այնուհետև՝ 2003 թվականին, նոր քրեական օրենսգիրք ընդունելուց հետո մահապատիժը փոխարինվեց ցմահ ազատազրկմամբ: Նա միակ դատապարտյալն էր, ում ներել էին սպանված զինծառայողների ծնողները:
Դատարանը իր լիազորությամբ Աշոտ Մանուկյանին պայմանական վաղաժամկետ ազատ արձակելով՝ նրա նկատմամբ նշանակել է 10 տարի ժամկետով փորձաշրջան, որի ընթացքում որևէ խնդրահարույց գործողություն չիրականացնելու դեպքում Մանուկյանը ամբողջապես կհամարվի ազատ արձակված:
«Պետությունը ազատ արձակելուց որոշակի պարտականություններ է սահմանել Աշոտ Մանուկյանի վրա: Օրինակ՝ առանց համապատասխան մարմինների տեղյակ պահելու մշտական բնակության վայր չփոխելը, կամ այն, որ նա պարտավոր է վերասոցիալականացման աշխատանքներին մասնակցել: Այդ պարտականությունները որևէ կերպ չեն սահմանափակում իր ազատության իրավունքը, և որոշակի պարտականությունները, որը ստանձնեց Աշոտ Մանուկյանը, կիրականացնի, ես վստահ եմ»,- 168.am-ին ասաց Միհրան Պողոսյանը:
Հիշեցնենք, որ 2019 թվականի սեպտեմբերի 6-ին Արմավիրի մարզի Էջմիածին քաղաքի ընդհանուր իրավասության դատարանը դատավոր Վահե Խալկաթյանի նախագահությամբ մերժել էր Աշոտ Մանուկյանին պայմանական վաղաժամկետ ազատ արձակելու պաշտպանների միջնորդությունը: Վերաքննիչ քրեական դատարանի դատավոր Մնացական Հարույթունյանն էլ այսօր բեկանեց առաջին ատյանի դատարանի այդ որոշումն ու ազատ արձակեց Մանուկյանին:
Տեղեկացնենք, որ Աշոտ Մանուկյանը Հայաստանի Հանրապետության պատմության մեջ դրսևորած դրական վարքի հիմքով ազատ արձակված երկրորդ ցմահ ազատազրկման դատապարտված դատապարտյալն է։
