Մոսկվայում գնդակահարել են հայ մարզիկի. Աշոտ Բոլյանը ՀՀ քաղաքացի էր
Մոսկվայում գնդակահարել են թաիլանդական բռնցքամարտի աշխարհի եռակի չեմպիոն (Քիքբոքսինգի համաշխարհային պրոֆեսիոնալ ասոցիացիայի վարկածով) Աշոտ Բոլյանին: ՌԴ-ում ՀՀ դեսպանությունը հայտնում է, որ նա ՀՀ քաղաքացի էր:
«Հայտնում ենք, որ դեսպանությունը կապ է հաստատել ՌԴ համապատասխան մարմինների հետ՝ Մոսկվայում հայազգի մարզիկ Ա․Բոլյանի սպանության դեպքի վերաբերյալ ԶԼՄ-ներում տեղ գտած տեղեկատվության առնչությամբ։ Ըստ դեսպանությանը փոխանցված տվյալների, 1979 թ․-ին ծնված Ա․Բոլյանի դին հայտնաբերվել է նոյեմբերի 13-ի երեկոյան Մոսկվայի հարավ-արևմուտքում (Նախիմովսկի պողոտա 59 հասցեում): ՌԴ Քննչական կոմիտեի Մոսկվայի քննչական գլխավոր վարչությունը դեպքի առնչությամբ հարուցել է քրեական գործ»,-նշում են դեսպանությունից:
Ռուսական ՏԱՍՍ-ը հաղորդել է, որ նոյեմբերի 13-ի երեկոյան 40-ամյա մարզիկը Նախիմովսկի պողոտայում գտնվող տնից դուրս է եկել դեպի իր ավտոմոբիլը, որտեղ անհայտ անձը մի քանի անգամ կրակել է նրա վրա, այդ թվում գլխին, եւ փախել: ՌԴ-ի Քննչական կոմիտեի Մոսկվայի Գլխավոր քննչական վարչության (ԳՔՎ) պաշտոնական ներկայացուցիչ Յուլյա Իվանովան հայտնել է, որ Մոսկվայի ԳՔՎ-ի քննչական մարմինների կողմից հարուցել է քրեական գործ ՌԴ-ի Քրեական օրենսգրքի 105-րդ հդվածի 1-ին մասով («Սպանություն») եւ 222-րդ հոդվածի 1-ին մասով («Զենքի ապօրինի շրջանառություն») նախատեսված հանցագործությունների հատկանիշիներով:
40-ամյա Աշոտ Բոլյանը թաիլանդական բռնցքամարտի աշխարհի եռակի չեմպիոն է Քիքբոքսինգի համաշխարհային պրոֆեսիոնալ ասոցիացիայի վարկածով եւ տարբեր միջազգային մրցախաղերի 17-ակի չեմպիոն: Գլխավորում էր Հայկական մարզական ֆեդերացիաների համաշխեարհային ասոցիացիան: Բացի դրանից, նա Մոսկվայում գրանցված «Կարատ» սահմանափակ պատասխանատվությամբ ընկերության գլխավոր տնօրենն էր, ընկերություն, որը կապված էր սպորտի ոլորտի հետ:
