Հրամանատարի սխալ գործողությունների մասին դեռ շատ բան կբացահայտվի

Երևանի ընդհանուր իրավասության դատարանի Շենգավիթ վարչական շրջանի նստավայրում դատավոր Դավիթ Բալայանի նախագահությամբ տեղի ունեցավ նախկին ազատամարտիկ, «Մուշ» ջոկատի անդամ Հարություն Սարգսյանի դատական նիստը: Սարգսյանը մեղադրվում է 15/166 զորամասի հրամանատար Ջոնի Սամսոնյանին դիտավորությամբ կյանքից զրկելու փորձ կատարելու և ապօրինի կերպով զենք պահելու համար: Ըստ Սարգսյանի՝ նա այս քայլին է գնացել, երբ զորամասի նոր հրամանատար Ջոնի Սամսոնյանը, անձնակազմից բողոքներ ստանալուց հետո, որոշել է աշխատանքից ազատել Հարություն Սամսոնյանին:

Դեպքը տեղի էր ունեցել 2019թ. ապրիլի 5-ին, ժամը 8-ի սահմաններում: Ըստ մեղադրանքի՝ «Հարություն Սարգսյանը Երևան քաղաքի Անդրանիկի փողոցի 90-րդ շենքի 1-ին հարկի շքամուտքում, նախապես ապօրինի  ձեռք բերված 7,6 մմ տրամաչափի 7 փամփուշտով լիցքավորված, նախկին ԽՍՀՄ 1941թ. գործարանային արտադրության «Նագան» տեսակի 7,62 մմ տրամաչափի ակոսափող թմբուկավոր ատրճանակից երկու կրակոց արձակելով՝  փորձել է դիտավորությամբ կյանքից զրկել Ջոնի Սամսոնյանին, սակայն հանդիպել է տուժողի դիմադրությանը և հանցանքն ավարտին չի հասցրել` իր կամքից անկախ հանգամանքներով պայմանավորված»:

Այսօրվա դատական նիստին ներկա էր՝ ինչպես ամբաստանյալ Հարություն Սարգսյանը, այնպես էլ՝ տուժող Ջոնի Սամսոնյանը:

Այսօր դատարանում հարցաքննվում էին գործով անցնող վկաներ՝ Գագիկ Խնկոյանը և Վահագն Խնկոյանը:

Գագիկ Խնկոյանը 15/166 զորամասում հրամանատարի նյութատեխնիկական գծով տեղակալն է: Հարցաքննության ժամանակ նա դատարանին ասաց, որ դեպքի մասին իրեն տեղեկացրել էր որդին՝ գործով անցնող մյուս վկա Վահագն Խնկոյանը, որն այդ օրերին աշխատել է տուժող Ջոնի Սամսոնյանի մոտ՝ որպես վարորդ:

«Զանգել է ինձ դեպքից հետո, ասել ՝«Հարութը  կրակել է հրամանատարի վրա», գնացել եմ հրամանատարի տուն: Գնացի տեսա՝ Սարգսյանը պառկած էր փորի վրա: Զենքը, տեսա, տղայիս ձեռքն էր: Հետո զանգել եմ ռազմական ոստիկանության պետին հրամանատարի համարից»,- դատարանում հայտարարեց Գագիկ Խնկոյանը:

Քանի որ Գագիկ Խնկոյանը դատարանի ու կողմերի հարցերին պատասխանում էր կցկտուր, դատախազը միջնորդություն ներկայացրեց հրապարակել Գագիկ Խնկոյանի նախաքննական ցուցմունքը:

«Այս մասով ցուցմունքը բովանդակային չէ, իսկ նախաքննական ցուցմունքով խոսքն ավելի բովանդակային էր, վկան ներկայացրել էր, թե ինչ են խոսել տուժողի հետ հիվանդանոցում» ,- ասաց դատախազը:

Բայց դատարանը միջնորդությունը չբավարարեց, քանի որ չկա էական տարբերություն դատաքննական և նախաքննական ցուցմունքների միջև: Ամբաստանյալ Հարություն Սարգսյանի շահերի պաշտպան, փաստաբան Մերի Ալավերդյանը, լսելով վկայի հարցաքննությունը, հարցրեց՝ արդյո՞ք Գագիկ Խնկոյանը կարող է դատարանին հայտնել, որ իր ցուցմունքներում չկա կաշկանդվածություն, քանի որ ինքն և իր որդին տուժողի ենթականերն են: Չնայած փաստաբանի հարցը բարկացրեց տուժող Ջոնի Սամսոնյանին, այդուամենայնիվ  վկան պատասխանեց, որ այդ հանգամանքն իրեն չի կաշկանդել: Հետո էլ դատարանի հարցին պատասխանելով՝ ասաց, որ չի փորձում հաճոյանալ իր հրամանատարին:

Այսօր հանցաքննվեց նաև գործով երկրորդ վկա Վահագն Խնկոյանը, որը 2018 թվականի հոկտեմբերից, երբ 15/166 զորամասում նոր հրամանատար էր նշանակվել Ջոնի Սամսոնյանը, աշխատել է՝ որպես հրամանատարի վարորդ:

«Ապրիլի 5-ին, 7:45 եղել ենք իրանց (հրամանատարի) բակում: Լսեցի կրակոցի ձայն, սկզբում ինձ թվաց՝ կրակոց չի, մոտ մի րոպե հետո ձայն լսեցի, հետո հարևանը դուռը բացեց, տեսա, որ մի հոգի պառկած ա, ու հրամանատարն էլ վրան պառկած ա: Միանգամից մոտեցա, հրամանատարն ասեց՝ «սկոռի կանչի, մեկ էլ կանչի, թող գան սրան տանեն»: Որ տենց ասեց, միանգամից դուրս եմ հելել, զանգել եմ հորս, առաջինը տեղյակ եմ պահել իրան, հետո ներս մտա, հարևանն ասեց՝ «ես սկոռի զանգել եմ», ու ես զանգել եմ ոստիկանություն»,- ասաց Վահագն Խնկոյանը, որը դեպքից 4 ամիս անց 15/166 զորամասում աշխատանքից դուրս է եկել:

Հետո ավելացրեց, որ այդ ժամանակ հրամանատարն իրեն ասել է՝ «կապելու բան բեր, սրա ձեռքերը կապենք, մինչև ոստիկանները գան», իսկ Հարություն Սարգսյանը, որը դեմքով գետնին ընկած է եղել, խնդրել է թույլ տալ, որ շնչի:

«Հարությունն ասում էր՝ «թող շնչեմ, մեկ ա, չեմ փախնելու, գնալու էի հանձնվեի»»,- ասաց Վահագն Խնկոյանը:

Գործով կա անցնող ևս 4 վկա: Նրանք այսօր ներկա չէին դատական նիստին:

Ամբաստանյալ Հարություն Սարգսյանի զինակից ընկերները վստահ են, որ պատերազմով անցած և ուղեղի ցնցում ստացած իրենց զինվորական ընկերը նման քայլի մտածված չէր գնա, ապա ավելացնում են. «այս գործով 15/166 զորամասի հրամանատարի սխալ գործողությունների մասին դեռ շատ բան կբացահայտվի»:

ԱՔՍԱՆՆԱ ՀԱՅՐԱՊԵՏՅԱՆ