Նոր Զելանդիայի խորհրդարանը բանակային նմուշի զենքի տիրելու արգելք սահմանեց
Նոր Զենլանդիայի խորհրդարանն ապրիլի 10-ին հավանություն է տվել մասնավոր կարգով բանակային նմուշի ավտոմատ եւ կիսաավտոմատ զենքի տիրելու գրեթե լիակատար արգելման մասին օրենքին՝ այդ երկրում մզկիթների վրա կատարված հարձակումից մեկ ամսից էլ պակաս ժամանակ անց: Այդ մասին հայտնել է Associated Press (AP) գործակալությունը:
Օրենքը պաշտպանել է 119 խորհրդարանական, դեմ է արտահայտվել սոսկ մեկ պատգամավոր:
«Անցյալում շատ քիչ դեպքեր են եղել, երբ ես այսպիսի միասնականություն տեսնեմ խորհրդարանում, եւ ես չեմ կարող պատկերացնել հանգամանքներ, երբ դա ավելի անհրաժեշտ լինի, քան այժմ»,- իր հերթին հայտարարել է Նոր Զելանդիայի վարչապետ Ջասինդա Արդենը:
Օրենքի ընդունումից հետո նման զենք ունեցողները կարող են այն հանձնել ոստիկանությանը փոխհատուցման դիմաց: Այն պահելու դեպքում օրենքը խախտողին կարող է սպառնալ մինչեւ հինգ տարվա ազատազրկում: Մարտի 15-ին Նոր Զելանդիայի Քրայսթչերչ քաղաքի կենտրոնի մզկիթում եւ այդ քաղաքի Լինվուդ արվարձանում գտնվող մզկիթում տեղի ունեցավ հրաձգություն: Հարձակման հետեւանքով զոհվեց 50 մարդ, տասնյակ մարդիկ վիրավորվեցին, հաղորդել է «Ինտերֆաքսը»:
