Հայաստանի ԱԳ նախարարը հանդիպել է Ռուանդայի տեղեկատվական և հաղորդակցման տեխնոլոգիաների, նորարարության նախարարին
Պաշտոնական այցելությամբ Կիգալիում գտնվող ՀՀ ԱԳ նախարար Զոհրաբ Մնացականյանը ապրիլի 7-ին հանդիպել է Ռուանդայի տեղեկատվական և հաղորդակցման տեխնոլոգիաների, նորարարության նախարար Պաուլա Ինգաբերին: Այս մասին տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից։
«Զրուցակիցները համակարծիք էին, որ Հայաստանի արտաքին քաղաքական գերատեսչության առաջին պաշտոնական այցն Աֆրիկյան մայրցամաք լավ հնարավորություն է ստեղծում տարածաշրջանի երկրների և, մասնավորապես, Ռուանդայի հետ բազմաոլորտ համագործակցության ընդլայնման ուղղությամբ ձեռնարկվելիք քայլերն ուրվագծելու համար։
Կարևորելով Հայաստանի և Ռուանդայի միջև հարաբերություններում առկա ներուժի լիարժեք իրացումը՝ նախարար Մնացականյանը, որպես գերակա ուղղություն, առանձնացրեց նորարարության, խելացի լուծումների, տեղեկատվական տեխնոլոգիաների և ստեղծագործ կրթության ոլորտները: Նախարար Մնացականյանը նշեց, որ իր պատվիրակության կազմում հայաստանյան ՏՏ ոլորտի ներկայացուցիչների ներգրավումը ևս մի կարևոր քայլ է առարկայական մտքերի փոխանակման միջոցով ուղենշելու տվյալ ոլորտներում Հայաստանի և Ռուանդայի միջև համագործակցության հեռանկարները:
Հայաստանի արտաքին քաղաքական գերատեսչության ղեկավարն իր զրուցակցին ներկայացրեց հոկտեմբերին Երևանում կայանալիք Տեղեկատվական տեխնոլոգիաների 23-րդ համաշխարհային համաժողովի նախապատրաստական աշխատանքները և հույս հայտնեց, որ ռուանդական ընկերություններն իրենց ակտիվ ներգրավվածությունը կունենան համաժողովին»,- նշված է հաղորդագրության մեջ:
