Արյան փոխներարկման կարիք ունեցող թալասեմիայով հիվանդ երեխաներն այսուհետ կստանան անվճար բուժում. ոլորտի պատասխանատու
ԱՀ առողջապահության նախարարության որոշման համաձայն՝ Արցախի Հանրապետությունում հաշվառված թալասեմիայով հիվանդ և արյան փոխներարկման կարիք ունեցող երեխաներն այսուհետ կստանան անվճար բուժում:
Այս մասին «Արցախպրես»-ի թղթակցի հետ զրույցում ասել է Ստեփանակերտի «Հանրապետական բժշկական կենտրոն»-ի ուռուցքաբանական ծառայության բժիշկ արյունաբան Ստելլա Թովմասյանը՝ նշելով, որ Արցախում թալասեմիայով հիվանդ և արյան փոխներարկման կարիք ունեցող 5 երեխա կա. նրանց մոտ հեմոգլոբինի ցուցանիշները ցածր են:
Ըստ նրա՝ արյան փոխներարկման գործընթացն ԱՀ-ում իրականացվում է «Արևիկ» մանկական հիվանդանոցի վերակենդանացման բաժանմունքում: Խոսելով թալասեմիա հիվանդության մասին՝ բժիշկ-արյունաբանն ասել է, որ այն ժառանգական հիվանդություն է:
«Տարբերակում ենք երկու տեսակի թալասեմիա՝ ալֆա և բետտա: Ալֆա թալասեմիաներն կապված են 4 գեների հետ. գեներից մեկի բացակայության հետևանքով հիվանդությունը լինում է ավելի թեթև արտահայտված, իսկ 4 գենի բացակայության դեպքում՝ ավելի ծանր: Բետտա թալասեմիաները լինում են հոմոզիգոտ և հետերոզիգոտ: Վերջիններս առավել տարածված տարբերակներն են, և հիվանդությունը առավել թեթև է արտահայտված, իսկ ավելի ծանր ձևերը հոմոզիգոտ տարբերակներն են, որոնց դեպքում հեմոգլոբինի ցուցանիշները բավականին ցածր են լինում: Այդ դեպքում կատարվում է արյան փոխներարկում, որոնց միջոցով փորձում ենք հեմոգլոբինի քանակը պահպանել 90-100 ցուցանիշների վրա, որպեսզի չունենանք հետագա բարդություններ՝ ոսկրային դեֆորմացինար, փայծաղի մեծացում և այլն: Փոխներարկման պարբերականությունը կախված է հեմոգլոբինի ցուցանիշներից»,-մանրամասնել է Ս. Թովմասյանը:
Անդրադառնալով հիվանդության առաջացման պատճառներին և տարածվածությանը՝ մեր զրուցակիցն ասել է, որ Արցախում տարածված է ավելի թեթև տարբերակներով թալասեմիաներ: Հիվանդության առաջացման հիմնական պատճառը մոտ ազգակիցների ամուսնական կապերն են:
Ըստ ոլորտի պատասխանատուի՝ հիվանդության հիմնական ախտանշաններն են՝ ընդհանուր թուլությունը, գունատությունը, երեխայի պասիվությունը, ախորժակ չունենալը. դրանք նկատելու դեպքում պետք է անպայման դիմել բժշկի:
«Քանի որ հիվանդությունը ժառանգական բնույթ է կրում, հետևաբար միակ բուժումն արյան փոխներարկումն է, որը պետք է իրականացվի ողջ կյանքում: Իսկ բուժման վերջնական տարբերկը ոսկրածուծի փոխպատվաստումն է, որը ՀՀ-ում թալասեմիաներով հիվանդների մոտ դեռևս չի իրականացվում»,-նշել է Ս. Թովմասյանը:
