Էդմոն Մարուքյանն ու Արամ Սարգսյանը չեն արձագանքել Նիկոլ Փաշինյանի կոչին
«Ասել էինք, որ պետք է շրջափակենք ՀՀԿ-ի շենքը՝ նիստը տեղափոխեցին Ծաղկաձոր, որ ասացինք՝ գնում ենք Ծաղկաձոր՝ մինչև մեր գնալն արեցին նիստը․այս ոճի մեջ անսպասելի չէր»,- Ֆրանսիայի հրապարակում լրագրողների հետ զրույցում ասաց «Քաղաքացիական պայմանագիր» կուսակցության նախագահ, ԱԺ «Ելք» խմբակցության ղեկավար Նիկոլ Փաշինյանը։
Հիշեցնենք, որ Ծաղկաձորում ապրիլի 14-ին տեղի է ունեցել ՀՀԿ գործադիր մարմնի և խորհրդի արտագնա նիստ, որի ժամանակ գործադիր մարմինը կուսակցության նախագահի առաջին տեղակալ Կարեն Կարապետյանի առաջարկությամբ որոշել է ՀՀ վարչապետի պաշտոնում ՀՀԿ խորհրդին ներկայացնել Հայաստանի Հանրապետական կուսակցության նախագահ Սերժ Սարգսյանի թեկնածությունը:
Փաշինյանը նշեց, որ երեկվա իր կոչին ընդդիմադիր ուժերից արձագանքել են Րաֆֆի Հովհաննիսյանն ու «Ազատ դեմոկրատները», իսկ Էդմոն Մարուքյանն ու Արամ Սարգսյանը չեն արձագանքել։
