Երիտասարդները Մխիթարյան միաբանության գործունեության գլխավոր հասցեատերերն են
Մխիթարյան միաբանության՝ Վենետիկի Սուրբ Ղազար կղզի մուտք գործելու 300-ամյակին նվիրված գիտաժողովը ևս մեկ առիթ է հանրահռչակելու միաբանության գործունեությունը:
Դեկտեմբերի 8-ին կայացած գիտաժողովին ներկա էր նաև Վենետիկի Մխիթարյան միաբանության ներկայացուցիչ Հայր Սերոբ վարդապետ Չամուռլյանը:
«Գիտաժողովն իրականացվում է ՀՀ մշակույթի նախարարության և «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի միջև կնքված պայմանագրի հիման վրա: Նման գիտաժողովներ մենք կազմակերպում ենք տարբեր թեմաներով: Դրանք անմիջականորեն կապված են հուշարձանների պահպանության հետ: Հուշարձանները հանդիսանում են համազգային արժեք, և անկախ նրանից, թե հայկականություն խորհրդանշող հուշարձանն աշխարհի որ ծայրում է գտնվում, պետք է հանրահռչակել այն: Եվ մենք միաբանությունը դիտարկում ենք որպես պատմական արժեք, հուշարձան»,- ասաց ՊՈԱԿ տնօրեն Արա Թարվերդյանը:
Մինչ գիտաժողովը եղել է այց Մխիթարյան միաբանություն, հավաքագրվել են շատ արժեքավոր լուսանկարներ միաբանության արխիվից և գրապահոցից: Այնուհետև հիմք է դրվել այս համագործակցությանը:
Հայր Սերոբ վարդապետ Չամուռլյանը շատ կարևորեց նման գիտաժողովներով ոչ միայն Մխիթարյան միաբանությանը, այլ նաև հայ իրականության մեծերին անդրադառնալը: «Մենք այսօր թվաքանակով գուցե փոքր ազգ ենք, սակայն ժառանգում ենք մեծ ազգի հսկա տուրք: Եվ պետք է աշխատենք այն զարգացնելու ուղղությամբ: 300-ամյակին նվիրված այս աշխուժությունը հայրենիքում մեզ համար մեծ խթան է»,- ասաց նա:
Հայր Սերոբ վարդապետ Չամուռլյանը դժվարացավ միաբանության 300-ամյա գործունեությունն ամբողջացնելով՝ առանձնացնել ամենակարևոր ձեռքբերումը: «Մխիթարյան միաբանության գործունեությունն ամփոփելով՝ տեսնում ենք բազմաթիվ հրատարակություններ, դաստիարակչական մեծ գործունեություն, սերունդների հետ մեծ աշխատանք: Եվ դրանցից որևէ մեկն առանձնացնել՝ կնշանակի արժեզրկել մյուսները: Մեր գործունեության գլխավոր ուղղություններից է, բնականաբար, հայապահպանությունը: Երիտասարդները մեր աշխատանքների գլխավոր հասցեատերերն են»,- ասաց նա ու կարևորեց հայրենիքի հետ կապի սերտացումը:
Գիտաժողովին զեկուցումներով հանդես եկան այն գիտնականները, ովքեր երբևէ զբաղվել կամ զբաղվում են Մխիթարյանների ամբողջ կենսագրությամբ: Նախատեսված է նաև «Կղզյակ, որ մեզ ետուր արև» խորագրով ցուցահանդես «Զվարթնոց» պատմամշակութային արգելոց-թանգարանում: Ցուցահանդեսի շրջանակում կներկայացվեն Մխիթարյան միաբանության 300 տարիների ձեռքբերումները, նաև հանրահայտ Կուտինայի հախճապակին:
