ՆԱՏՕ-ի երկրները միացան ԻՊ-ի դեմ գործող կոալիցիային և ընդունեցին բյուջեի մեծացման պլանը
Բրյուսելում ավարտվել է 10 տարվա ընթացքում ՆԱՏՕ-ի ամենակարճատեւ նիստը, որի ընթացքում գործնականում առանց քննարկման ընդունել են վաղօրոք համաձայնեցված մի քանի որոշումներ, ինչպիսիք են ԱՄՆ-ի հրամանատարության ներքո «Իսլամական պետություն» (ԻՊ) ահաբեկչական կազմակերպության դեմ գործող կոալիցիային շուտով միանալու մասին հայտարարումը, դաշինքի երկրների համար ռազմական ծախսերի ավելացման գործողությունների ամենամյա ազգային պլանների սահմանումը, ինչպես նաեւ հայտարարվել է տեղեկատվության փոխանակման հակաահաբեկչական կենտրոնի ստեղծման մասին։
Կայացած հանդիպման արդյունքների վերաբերյալ փաստաթղթեր չեն հրապարակվել: Գագաթնաժողովը գումարվել էր երկու հիմնական խնդիրների կատարման համար. դաշինքին ԱՄՆ-ի նոր նախագահի առաջին ծանոթությունը եւ դաշինքին կենտրոնակայանի նոր շենքի հանձնումը:
Դաշինքի պետությունների եւ կառավարությունների ղեկավարների հաջորդ գագաթնաժողովը տեղի կունենա 2018 թվականին: Այս մասին հայտարարել է կազմակերպության գլխավոր քարտուղար Ենս Ստոլտենբերգը Բրյուսելի հանդիպման արդյունքներին նվիրված մամուլի ասուլիսում:
Դաշինքը մտադիրէ մեծացնել իր ավանդը միջազգային ահաբեկչության սպառնալիքի դեմ մղվող պայքարում:
«Մենք որոշեցինք մեծացնել մեր աջակցությունը միջազգային կոալիցիային, որպեսզի հաղթենք ԻՊին: Մենք նաեւ համաձայնեցինք, որ ՆԱՏՕ-ն դառնա կոալիցիայի լիիրավ անդամ, որի մեջ են արդեն դաշինքի բոլոր 28 երկրները, նշել է Ստոլտենբերգը: Լինել կոալիցիայի անդամ չի նշանակում, թե ՆԱՏՕ-ն կմասնակցի մարտական գործողություններին, սակայն դա հզոր
ազդանշան է ահաբեկչության դեմ միջազգային պայքարի գործում մեր հանձնառության մասին: ՆԱՏՕ-ն հնարավորություն կստանա մասնակցելու քաղաքական որոշումների մշակմանը»,-հաղորդել է ՏԱՍՍ-ը:
Լուսանկարը` AP
