Փենսը՝ ԿԺԴՀ-ի շուրջ ստեղծված իրադրության մասին. խաղաղությունն ուժով է ձեռք բերվում
ԱՄՆ-ի փոխնախագահ Մայք Փենսը, որը գտնվում է Ճապոնիայում, խոսելով ԿԺԴՀ-ի շուրջ ստեղծված իրադրության մասին, հայտարարել է, որ խաղաղությունն ուժով է ձեռք բերվում։
Ճապոնիայի վարչապետ Սինձո Աբեի հետ կայացած հանդիպմանը, ինչպես փոխանցում է Kyodo գործակալությունը, Փենսն ընդգծել է, որ իր երկիրը, ինչպես եւ Ճապոնիան, խաղաղություն է ցանկանում տարածաշրջանում, սակայն հիշեցրել է, որ «խաղաղությունն ուժով է ձեռք բերվում»:
Բացի այդ նա հայտարարել է, որ ԱՄՆ-ը հաստատակամորեն մտադիր է գործակցել Ճապոնիայի, Հարավային Կորեայի եւ Չինաստանի հետ Հյուսիսային կորեայի միջուկային հիմնախնդրի խաղաղ լուծման հասնելու համար:
ԱՄՆ-ի փոխնախագահը կատարում է ասիական շրջագայություն, որի ընթացքում նա այցելել է Հարավային Կորեա եւ ժամանել Տոկիո:
Իր հերթին ԱՄՆ-ի նախագահ Դոնալդ Թրամփը Fox News հեռուստաալիքին տված հարցազրույցում հույս է հայտնել, որ Վաշինգտոնի եւ Փենյանի միջեւ առկա լարվածությունը կլուծվի խաղաղ ճանապարհով:
«Չեմ ցանկանում պատմել՝ ինչ եմ ես անում կամ ինչ եմ մտածում: Ես այնպես չեմ գործում, ինչպես նախորդ վարչակազմերը, որոնք չորս շաբաթ առաջ ասում էին, թե ինչ են իրենք մտադիր ձեռնարկել: Դա այդպես չի արվում»,-ասել է Թրամփը՝ պատասխանելով այն հարցին, թե ինքը դիտարկում է արդյոք ԿԺԴՀ-ին հարված հասցնելը:
«Մենք կտեսնենք, ինչ կլինի, հավելել է նա: Հուսով եմ, որ ամեն ինչ լավ կավարտվի: Հուսով եմ, որ կլինի խաղաղություն, սակայն այդ ջենթլմենի (նկատի ունի ԿԺԴՀ-ի առաջնորդին) հետ արդեն բավական երկար են խոսում»,-հաղորդել է ՌԻԱ Նովոստին։
