Յուլյա Սամոյլովան կմասնակցի 2018-ի «Եվրատեսիլ»-ին. Էռնստ
Երգչուհի Յուլյա Սամոյլովան, որը չի մեկնի այս տարվա մայիսին Կիեւում անցկացվելիք «Եվրատեսիլ»-ին, կմասնակցի 2018 թվականի մրցույթին. Եվրոպական հեռարձակողների միության հետ կա համապատասխան պայմանավորվածություն: Այդ մասին ՏԱՍՍ-ին հայտնել է «Առաջին ալիքի» գլխավոր տնօրեն Կոնստանտին Էռնստը:
Նախօրյակին «Առաջին ալիքը» հրաժարվել է Կիեւի երաժշտական ստուգատեսը հեռարձակելուց: Որոշումն ընդունվել է Ուկրաինա Սամոյլովայի մուտքի արգելման ֆոնին:
«Մենք դա քննարկել ենք Եվրոպական հեռարձակողների միության հետ, եւ նրանք գիտեն, որ Ռուսաստանից մասնակցելու է Յուլյա Սամոյլովան»,-ասել է Էռնստը՝ պատասխանելով «Եվրատեսիլ-2018»-ին Ռուսաստանի մասնակցության հնարավորության վերաբերյալ ՏԱՍՍ-ի թղթակցի հարցին:
Ավելի վաղ Յուլյա Սամոյլովան ասել է, թե վշտացած է, որ ԵՀՄ-ն չկարողացավ Կիեւի հետ կարգավորել Ուկրաինա իր մուտքի արգելման հարցը: Այդուամենայնիվ, երգչուհին հուսով է, որ երբեւիցե ելույթ կունենա մրցույթում:
«Ես հավատում եմ, որ դա դեռ տեղի կունենա: Իմ օրինակով ես ցանկանում եմ ոգեշնչել բոլոր մարդկանց, որ նրանք չհանձնվեն ցանկացած իրավիճակում»,-ասել է Սամոյլովան:
Ապրիլի 13-ին Առաջին ալիքը նամակ է ստացել երգի մրցույթի կազմակերպիչներից, որով տեղեկացվում է, որ ԵՀՄ-ն չկարողացավ ուկրաինական կողմի հետ փոխզիջման հասնել այդ հարցի շուրջ: Դրանից հետո Առաջին ալիքը որոշում է ընդունել հրաժարվել մրցույթի հեռարձակումից: Մրցույթի կազմակերպիչները հաստատել են, որ Ռուսաստանը չի մասնակցի շոուին, եւ ափսոսանք են հայտնել, որ երկիրն այս տարի չի կարողանա «Եվրաստեսիլ»-ի մաս դառնալ:
«Եվրատեսիլ-2017»-ի կիսաեզրափակիչներն Ուկրաինայի մայրաքաղաքում անցկացվելու են մայիսի 9-ին եւ 11-ին, եզրափակիչը՝ մայիսի 13-ին: Գլխավոր արենան կդառնա Միջազգային ցուցահանդեսային կենտրոնը:
