Կրթության պետական տեսչությունն ուսումնասիրում է թիվ 3 հենակետային ավագ դպրոցում դրամահավաքության դեպքը
Կրթության եւ գիտության նախարարի հանձնարարականով` Կրթության պետական տեսչությունն ուսումնասիրում է դպրոցներից մեկում դրամահավաքության հետ կապված դեպքի մանրամասները:
«Արմենպրես»-ի հետ զրույցում ԿԳՆ հանրակրթության վարչության պետ Աշոտ Արշակյանն ասաց, որ Մ. Աբեղյանի անվ. թիվ 3 հենակետային ավագ դպրոցի մի խումբ ծնողների կողմից նախարար Լեւոն Մկրտչյանին ուղղված բաց նամակից հետո նախարարը շրջաբերական է ուղարկել բոլոր ավագ դպրոցներին: «Մոտեցումը բավական խիստ է լինելու»,-հավելեց նա:
Մ. Աբեղյանի անվ. թիվ 3 հենակետային ավագ դպրոցի 12-րդ ավարտական դասարանի մի խումբ ծնողների կողմից ուղարկված բաց նամակում նշված էր, որ դպրոցում տնօրինության կողմից (տնօրեն՝ Ա. Մարուխյան) ստիպողաբար իրականացվում են տարբեր դրամահավաքներ, պարտադրվում են հավելյալ չհիմնավորված ծախսեր և վճարումներ՝ անտեսելով ծնողների կարծիքը և հնարավորությունները, ինչպես նաև աշակերտների ցանկությունները:
