«ՀՀԿ-ն կշարունակի բարեփոխումների այն կուրսը, որը սկսել է». Կարեն Կարապետյան
«Իզվեստիա» թերթին տված հարցազրույցում ՀՀ վարչապետ Կարեն Կարապետյանը հայտարարել է, որ ՀՀԿ-ն շարունակելու է բարեփոխումների այն կուրսը, որը սկսել է:
Լրագրողը ՀՀ վարչապետի հետ զրույցում նշել է, որ տեղի բնակիչները ընտրությունների ժամանակ հետաքրքիր կարծիք են հայտնել. օրինակ՝ ուսանողներն ասել են, որ քվեարկելու են «Ելք» ընդդիմադիր դաշինքի օգտին՝ ի նշան բողոքի, մի մասն էլ ասել է, որ եթե Կարեն Կարապետյանը շարունակի զբաղեցնել վարչապետի պաշտոնը՝ կքվեարկեն Հանրապետական կուսակցության օգտին: Լրագրողը ՀՀ վարչապետին խնդրել է իր խոսքը փոխանցել այդ ընտրազանգվածին:
«Երբ մարդիկ անկեղծորեն հավատում են քեզ, դա հսկայական պատասխանատվություն է նրանց նկատմամբ: Ես դա հասկանում եմ և շատ պատասխանատու կերպով եմ դրան վերաբերվում: Հանրապետական կուսակցության հաղթանակից հետո մեր կառավարությունը կշարունակի բարեփոխումների կուրսը, որոնք մենք սկսել ենք և ես կասեի, հաջողությամբ ենք շարժվում առաջ»,- ասել է Կարեն Կարապետյանը՝ ավելացնելով, որ կառավարությունը բաց է և քննադատության, և համագործակցության համար:
Կարեն Կարապետյանն ընդգծել է, որ իրենք փորձում են վերականգնել իշխանության նկատմամբ վստահությունը, գտնել տնտեսական և սոցիալական որոշումներ, որոնք կապահովեն պետության կայուն զարգացումը՝ սկսած այսօրվանից և տասնամյակներ անց, կամրապնդեն Հայաստանի դիրքերը տարածաշրջանում:
«Մենք շահագրգռված ենք մեր երկրի զարգացմամբ: Փոխել պետք է շատ բան, բայց քայլ առ քայլ միասին մենք կարող ենք հասնել մեր առջև դրված նպատակներին, իսկ նպատակներն ու ռազմավարությունները հստակ սահմանված են, և դա շատ կարևոր է»,- ասել է ՀՀ վարչապետը:
