«Ո՞նց կարող է՝ 40-45 համայնքում 0 ձայն ստանայի». Լյովա Խաչատրյանը զարմացած է
«Ծառուկյան» դաշինքի ռեյտինգային թեկնածու Լյովա Խաչատրյանի համար խորհրդարանական ընտրություններում դաշինքի ստացած 27.37%-ն անսպասելի էր։ 168.am-ի հետ զրույցում Լ. Խաչատրյանը դժվարացավ մեկնաբանել, թե ինչու այդպիսի արդյունք գրանցվեց։
«Համեմատեք մեր բազմամարդ հավաքներն ու մյուսները։ Մեր ինքնաբուխ հավաքները չէին կարող նման արդյունք ապահովել»,- ասաց Լ.Խաչատրյանը։
Ամենազարմանալին թեկնածուի համար ընտրատարածքի մոտ 40-45 համայնքներում իր ստացած 0-ն է եղել. «Նայում եմ, իմ ձայները մոտ 40 համայնքում 0 է։ Դա բացառված է, նման բան չի կարող լինել, որտեղ վստահված անձ ու հանձնաժողովի անդամ չեմ ունեցել։ Նման բան անգամ թեորիապես չի կարող լինել»։
Ըստ նրա՝ դա միանշանակ խոսում է այն մասին, որ կեղծիք է եղել. «Ես վստահաբար գիտեմ, որ չէր կարող նման բան լինել, ես այնտեղ անգամ բարեկամներ ունեմ, գոնե 1, 2, 3 ձայն պետք է ստանայի։ Ո՞նց կարող է 40-45 համայնքում 0 լինել։ Էն էլ էն տեղերում, որտեղ ես պատգամավոր եմ եղել, հանդիպումներ են ունեցել և մարդիկ եմ ունեցել, բայց հաշվարկի ժամանակ ներկայացուցիչ չեմ ունեցել»։
Լ.Խաչատրյանի խոսքով՝ այն համայնքներում, որտեղ ինքը ներկայացուցիչ ունեցել է, արդյունքները գոհացուցիչ են։ Նա նշեց, որ տեսախցիկները նորմալ չեն աշխատել, իսկ բողոքարկելը և վերահաշվարկն առանձնապես արդյունավետ չեն լինի, քանի որ քվեաթերթիկներն ազատ լցված են եղել և փոխելը բոլորովին բարդ չէր. «Բա նենց օրենսգիրք է, որ բուխտ ու բառադի լցված էին բյուլետենները՝ ինչքան ասես»։
Լ.Խաչատրյանի խոսքով՝ կուսակցությունը պետք է որոշի՝ բողոքարկե՞լ արդյունքները, թե՞ ոչ, իսկ թեկնածուն իրավունք չունի բողոքարկելու։ Նա նշեց, որ կուսակցությունում այդ հարցը դեռ չեն քննարկել։
