Կյանքից հեռացել է հասարակական գործիչ, հայազգի բարերար Հասմիկ Փարիզ Հովնանյանը

Ս.թ. նոյեմբերի 20-ին կյանքից հեռացավ հասարակական գործիչ և հայ մեծ բարերար, լուսահոգի Վահագն Հովնանյանի կինը` Հասմիկ Փարիզ Հովնանյանը, ում կյանքի ուղին ևս նշանավորվել է բազում ներդրումներով՝ ի նպաստ հայ ժողովրդի բարգավաճման և հայրենիքի շենացման:

Իր կյանքի ընթացքում Հասմիկ Հովնանյանը նախաձեռնել ու իրականացրել է բազում բարեգործական ծրագրեր՝ նպաստելով հայրենիքում և սփյուռքում հայկական ինքնության և արժեքների պահպանմանը: Իր շուրջը համախմբելով իր և ամուսու համախոհ նվիրյալների՝ նա իր ուրույն դերն է ունեցել հայրենիք-սփյուռք մշակութային կապերի ամրապնդման գործում:

Հայաստանի անկախացման առաջին տարիներին հաստատվելով հայրենիքում՝ Հասմիկ Հովնանյանը՝ ամուսնու հետ միասին, ձեռնամուխ է եղել հայ մշակույթին ու արվեստին նյութապես և բարոյապես աջակցմանը, ինչի մասին են վկայում ժողովրդի սերը, մրցանակներն ու կոչումները:

Մեծ բարերարի վերջին հրաժեշտի արարողությունը տեղի ունեցավ ս. թ. նոյեմբերի 22-ին Երևանի Սուրբ Հովհաննես Մկրտիչ եկեղեցում։

hasmik-hovnanian_2

Հասմիկ Հովնանյանի մասին

Փարիզ Հասմիկ Բագդոյան Հովնանյանը ծնվել է Երուսաղեմում 1929 թ.-ի հունվարի 1-ին: 1948 թ.-ին՝ 19 տարեկանում, Հասմիկը ընտանիքի հետ տեղափոխվել է Կիպրոս, որտեղ դասավանդել է մանկապարտեզում մինչև Նյու Յորք տեղափոխվելը: Նյու Յորքում ուսումնասիրել է սոցիոլոգիա Hunter College-ում:

1955 թ.-ին Ատլանտիկ Սիթիում նա հանդիպել է Վահագն Ս. Հովնանյանին Հայ ուսանողների ասոցիացիայում, իսկ երկու տարի անց՝ 1957 թ.-ին, նրանք ամուսնացել են: 1959 թ.-ին ծնվել է Հովնանյանների առաջնեկը՝ Շանթ Ստեփան Հովնանյանը:

Շուտով Վահագն Հովնանյանը դարձել է Նյու Ջերսիի Սբ. Վարդանանց առաքելական եկեղեցու հոգաբարձուների խորհրդի անդամ, իսկ Հասմիկը միացել է «Ladies Auxiliary» միությանը: Որոշ ժամանակ անց Հասմիկ Հովնանյանը դառնում է երկու կառույցների ղեկավար:

1972 թ.-ին՝ Ամերիկայի Հայ Առաքելական եկեղեցու արևելյան թեմի նոր առաջնորդի ընտրվելուց հետո, Հասմիկն իր ընկերների հետ հիմնել է «Prelacy’s Ladies Guild» միությունը, որն էլ ղեկավարել է մինչև 1976 թ.:

hasmik-hovnanian

Վահագն Հովնանյանի հետ միասին նա միշտ փորձել է համախմբել Միացյալ Նահանգների հայ համայնքի ներկայացուցիչներին տարբեր միջոցառումների շուրջ, ինչպիսիք են Կանանց միության «Արևածաղիկ» տարեկան ճաշկերույթը և Լույսերի տոնի միջոցառումը Նյու Յորքում, ինչպես նաև Հայոց ցեղասպանության 60-ամյակին նվիրված ոգեկոչման միջոցառումը Նյու Յորքի Մեդիսոն սքուեր գարդենում:

1976 թ.-ին Հասմիկը, նրա ամուսինը համախոհ ընկերների հետ միասին Սուրբ Վարդանանց եկեղեցուն կից հիմնադրել են Նյու Ջերսիի հայկական դպրոցը՝ առաջին անկախ հայկական ցերեկային դպրոցն ԱՄՆ-ում: Հասմիկը հիմնել է նաև Friends կոմիտեն, որը կոչված էր օժանդակելու դպրոցի օգտին դրամահավաքին: Հասմիկի ստեղծագործական ջիղի շնորհիվ դպրոցի բազմաթիվ տարեկան իրադարձություններ ուղենիշ են դարձել հայ համայնքի համար:

1984թ.-ին հոգաբարձուների խորհուրդը միաձայն որոշում է կայացնում Հովնանյան զույգի պատվին այն վերանվանել Հովնանյան դպրոց: Դպրոցի տասներորդ տարեդարձի կապակցությամբ Մեծի Տանն Կիլիկիո Գարեգին Բ կաթողիկոսը Վահագն և Հասմիկ Հովնանյաններին շնորհել է «Prince and Princess of the Armenian Church» կոչումը:

Հասմիկ Հովնանյանը Նյու Յորքի արվեստի ակադեմիայի, Drumthwacket հիմնադրամի ու Նյու Ջերսիում հոլոքոստի մասին կրթության հանձնաժողովի հիմնադիր խորհրդի անդամ էր:

Հայաստանի անկախացումից հետո՝ 1991թ.-ին, Հասմիկն ու իր ամուսինը կազմակերպում ու աջակցում էին տարբեր փոխանակման ծրագրերի Կոմիտասի անվան պետական կոնսերվատորիայի և Նյու Յորքի Juillard School–ի միջև:

2000թ-ի մայիսին պարոն և տիկին Հովնանյանները հիմնել են «Սայաթ-Նովա» մրցանակաբաշխությունը` որպես հայ երգահաններին սատարող և հայկական երաժշտական ավանդույթները խթանող մրցույթ: 2002թ-ին հիմնադրել են «Վահագնի» մրցանակաբաշխությունը` որպես թատրոնի, գրականության, կինոյի և գեղարվեստի գործիչներին խրախուսելու և սատարելու ևս մեկ գործոն:

2008 թ.-ին ամենամյա «Արևածաղիկ» ճաշկերույթի ժամանակ հայ համայնքի առաջնորդ արքեպիսկոպոս Օշականի կողմից Հասմիկն արժանացել է «Queen Zabel of the Kingdom of Cilicia» կոչման՝ հայկական համայնքին իր երկար տարիների նվիրումի համար: 2011 թ.-ին Հասմիկ Փարիզն արժանացավ Fridtjof Nansen մրցանակի՝ ամբողջ աշխարհում հայ համայնքի նկատմամբ իր անխախտ նվիրվածության համար:

hasmik-hovnanian_3

Իր մահից հետո Հասմիկը կմիանա իր ամուսնուն՝ Վահագն Հովնանյանին, ով մահացել է 2015 թ.-ի օգոստոսին: Նրա հիշատակը վառ կմնա իր որդու՝ Շանթի, դստեր և փեսայի՝ Նինա Հովնանյանի և Արթուր Ալեքսանյանի, և նրա հինգ թոռների՝ Վահագնի, Գայանեի, Կատյայի, Փարիզի, Չարենցի, քրոջ՝ Թենիի և իր ընտանիքի շնորհիվ, վերջիններս բնակվում են Կալիֆորնիայում, և մեծ ու օրհնված Հովնանյան ընտանիքի շնորհիվ:

Հովնանյան ընտանիքը սիրով խնդրում է, որպեսզի զորակցություն հայտնելու նպատակով նվիրատվություններ կատարվեն հետևյալ հաշվեհամարներին.

Հովնանյան դպրոց
817 Ռիվեր Ռոուդ
Նյու Միլֆորդ, Նյու Ջերսի 07646

Bank of America

Հաշվեհամար՝ #003815093982

Swift կոդ` #BOFAUS3N

Կամ

Teach for Armenia

փոխանցումներ ԱՄՆ դոլարով՝ 1570022002750101

փոխանցումներ ՀՀ դրամով՝ 1570022002750100

Բանկ՝ Ամերիաբանկ ՓԲԸ

Սվիֆթ կոդ՝ BIC ARMIAM22

ՀՎՀՀ՝ 02618379