Հռոմի պապի արածը «զրպարտություն» է. Ջեմիլ Չիչեք
Թուրքական Anadolu լրատվական գործակալության փոխանցմամբ՝ Թուրքիայի խորհրդարանի նախագահ Ջեմիլ Չիչեքն արձագանքել է Հայոց ցեղասպանության վերաբերյալ Հռոմի պապի արած հայտարարությանը: Չիչեքը հայտարարել է, որ Հռոմի պապի արածը «զրպարտություն» է:
Չիչեքը հայտարարել է, որ 2015 թվականը Թուրքիայի համար բեկումնային տարի է՝ հավելելով, որ Հայկական սփյուռքը մեծապես պատրաստվել է Հայոց ցեղասպանության 100-րդ տարելիցին՝ «այդ կեղծիքն» ընդունել տալու համար. «Առաջին համաշխարհային պատերազմի ժամանակ միայն հայերը չէ, որ ցավեր են վերապրել, դա առնչվել է օսմանյան սուբյեկտներից յուրաքանչյուրին:
Ծավալվել է այդպօրինակ վարկաբեկիչ կամպանիա, որ այդ ցավը հայերինն է, ինչը միակողմանի, անարդար գնահատական է: Հռոմի պապն էլ միացել է դրան: Պապի արածը զրպարտանք է, խտրական և անընդունելի, ուղղված է իսլամի դեմ: Այդ հայտարարությունը խաթարում է պատմական իրողությունները և մտահոգիչ հայտարարություն է»:
