Ճապոնիան նոր պատժամիջոցներ է սահմանել Ուկրաինայի շուրջ տիրող իրավիճակի կապակցությամբ
Ռուսական ТАСС լրատվական գործակալության փոխանցմամբ՝ Ճապոնիայի կառավարությունն այսօր որոշում է ընդունել նոր պատժամիջոցներ սահմանելու մասին՝ կապված Ուկրաինայի շուրջ տիրող իրավիճակի հետ:
Կառավարության նիստում հաստատվել է 26 անձից ու 14 կազմակերպությունից բաղկացած ցուցակը, որոնք գերազանցապես ներկայացնում են Դոնեցկի ու Լուգանսկի ժողովրդական հանրապետությունները: Նրանց արգելվում է տրամադրել վիզա, իսկ նրանց գույքը Ճապոնիայում հայտնաբերվելու դեպքում կսառեցվի:
Ճապոնիայի կառավարության գլխավոր քարտուղար Յոսիխիդե Սուգան հայտարարել է, որ պատժամիջոցները կապված են Դոնբասում ընտրություններ անցկացնելու հետ. «Մենք կարծում ենք, որ այս անգամ ձեռնարկված միջոցները չեն ազդի Պուտինի ճապոնական այցի վրա»: Ավելի վաղ հաղորդվել էր, որ Ռուսաստանի նախագահ Վլադիմիր Պուտինը պաշտոնական այցով Տոկիո է ժամանելու 2015 թվականին:
