Շոտլանդիայի կառավարության ղեկավարը հրաժարական է տվել
BBC News-ի փոխանցմամբ՝ Շոտլանդիայի առաջին նախարար, Ազգային կուսակցության ղեկավար Ալեքս Սալմոնդը պաշտոնապես հրաժարական է տվել: Շոտլանդիայի խորհրդարանն այսօր քվեարկելու է այդ պաշտոնում նոր թեկնածուի համար:
Իր վերջին ելույթում Սալմոնդը հիշեցրել է, որ Շոտլանդիայի կառավարությունում աշխատել է 7.5 տարի և որ ներկայիս պաշտոնը թողնում է լավատեսության ու վստահության զգացումով: Նա վստահություն է հայտնել, որ նոր առաջին նախարար կդառնա հանրահայտ քաղաքական գործիչ, և չնայած դրան՝ ինքն ավելի շատ վստահում է Շոտլանդիայի ժողովրդի իմաստնությանն ու տաղանդին:
Որպես իր իրավահաջորդ՝ Սալմոնդն առաջարկել է կառավարության ղեկավարի տեղակալ Նիկոլա Սթերջենին: Եթե խորհրդարանը հաստատի վերջինիս թեկնածությունը, ապա նա կդառնա Շոտլանդիայի կառավարության ղեկավարի պաշտոնը զբաղեցրած առաջին կինը: Սալմոնը հրաժարական տալու իր մտադրության մասին հայտնել էր դեռևս սեպտեմբերի 19-ին՝ անկախության մասին հանրաքվեում պարտություն կրելուց հետո:
