Շատ ավելի շտապ և լուրջ հարցեր կան լուծելու, քան զբաղվել շիրիմների տեղափոխության խնդրով
«Դա մեր պատմությունն է: Հնարավոր է, որ մարդիկ տարբեր մոտեցումներ ունենան, բայց դա մեր պատմությունն է: Մովսես Գեորգիսյանի շիրիմը ժամանակաշրջանի յուրօրինակ կնիքն է: Այդ կնիքները նորից ջնջել, վերադասավորել և այլն, ամեն դեպքում չեմ համարում, որ ճիշտ է, քանի որ դա ունի իր խորհուրդը: Այդ ժամանակաշրջանը մի զգալի չափով այդ բանալին է նաև բացում մեր սերունդների համար: Վերահուղարկավորումները ինչքանո՞վ պետք է նպաստեն սերունդների հիշողության մեջ այդ ընթացքի վերականգնմանը, նրա ուսումնասիրությանը, նրա ընկալմանը և նրա զգացողությանը»,- 168.am-ի հարցին, թե ինչպե՞ս է գնահատում ԱԻՄ նախագահ Պարույր Հայրիկյանի առաջարկը՝ Մովսես Գեորգիսյանի աճյունը (ինչպես նաև բոլոր նրանց աճյունները, ովքեր ցեղասպանության զոհեր չեն) Ծիծեռնակաբերդից տեղափոխել Կոմիտասի անվան Պանթեոն այսպես արձագանքեց արձագանքեց 4-րդ գումարման Ազգային Ժողովի պատգամավոր, կրոնագետ Վարդան Խաչատրյանը:
Նրա կարծիքով՝ յուրաքանչյուր այդպիսի երևույթ, այս դեպքում՝ կոնկրետ Մովսես Գեորգիսյանի հուղարկավորության վայրը և տարեթիվը ունեն նշանակալից խորհուրդ, որը պատմության իրողությունների երաշխիք է հանդիսանում.
«Անգամ երբ գերեզմանաքարը սարքել են, գերեզմանաքարը ևս կրում է այդ ժամանակաշրջանի կնիքը: Այդ քարերի վրա ցուցադրված է այդ պայքարի ընթացքը հայ ժողովրդի համար: Եվ, այս տեսակետից՝ վերանայել այդ կնիքը և տեղափոխել, ես համարում եմ, որ ճիշտ չէ, թեկուզ՝ ապագայի սերունդների համար թողնելու այդ անցումային ժամանակահատվածի (որը ճակատագրական նշանակություն է ունեցել) բանալին: Այս առումով, մյուս գերեզմանները թողնել, իսկ այդ մեկը հանել… հենց ժամանաակհատվածի հետ կապված խնդիրներ կարող է առաջացնել: Ես կցանկանայի, որ այն մնար իր տեղում որպես ժամանակաշրջանի յուրօրինակ վավերացումը, յուրօրինակ սիմվոլը»:
Վարդան Խաչատրայնը նույնպես այն տեսակետն ունի, որ Հայաստանի համար հիմա իսկապես շատ ավելի շտապ և լուրջ հարցեր կան լուծելու, քան զբաղվել շիրիմների տեղափոխության խնդրով:
«Ամեն ինչ մեր շրջապատում այրվում է, ամեն ինչ փոփոխվում է, և տեկտոնիկ փոփոխություններ են տեղի ունենում, որոնք վաղ թե ուշ շոշափելու են նաև Հայաստանը: Արդյո՞ք մեր կարևորագույն խնդիրը կայանում է նրանում, որ պայմանական ընթացք ապահովել ինչ-որ հարցերում, թե՞ չէ»,- նշեց նախկին պատգամավորը:
