Առողջապահության նախարարությունը՝ Գյումրիի ծննդատանը արձանագրված մայրական մահվան վերաբերյալ
Մայիսի 28-ին, ժամը 22-30-ի սահմաններում Գյումրու Մոր և մանկան ավստրիական հիվանդանոցում արձանագրվել է մայրական մահվան դեպք: ՀՀ առողջապահության նախարար Արմեն Մուրադյանի հանձնարարությամբ անմիջապես Գյումրի է մեկնել ՀՀ ԱՆ գլխավոր մանկաբարձ-գինեկոլոգ Ռազմիկ Աբրահամյանը մասնագետների խմբի` անեսթեզիոլոգի, ռեանիմատոլոգի և մանկաբարձ-գինեկոլոգի հետ։ Խումբը մշտական հեռախոսակապի մեջ է եղել ՀՀ ԱՆ գլխավոր ռեանիմատոլոգ Անատոլի Գնունու հետ։
Տեղում ծանոթացել են բժշկական փաստաթղթերին, այդ թվում` ծննդաբերության պատմությանը, ինչպես նաև ձեռնարկված բժշկական միջոցառումներին։
Կինը եղել է ծննդաբերության առաջին շրջանում, առողջական ցուցանիշները` զարկերակային ճնշումը, անոթազարկը, շնչառությունը, եղել են նորմալ։ Հանկարծակի վիճակը կտրուկ վատացել է, արձանագրվել է գիտակցության կորուստ, շնչառության կանգ, անոթազարկի բացակայություն։ Ռեանիմատոլոգի կողմից ձեռնարկված անհրաժեշտ միջոցառումները, ցավոք, արդյունք չեն տվել և արձանագրվել է կենսաբանական մահ։
Ենթադրյալ ախտորուշումն է` 41-42 շաբաթական հղիություն, երրորդ աստիճանի ճարպակալում, ծննդաբերության առաջին շրջան, պտղաջրերի վաղ արտահոսք։
Մահվան հավանական պատճառն է հարպտղաջրային էմբոլիան։
Ուսումնասիրության արդյունքները կքննարկվեն ՀՀ ԱՆ ծննդօգնության խորհրդում։ Նախարարի կողմից ղեկավարվող խորհուրդն այսուհետև կքննարկի նաև բոլոր այն բարդությունները, որոնք կարող են հանգեցնել նման ելքի։
Արմեն Մուրադյանը միաժամանակ հանձնարարել է ուժեղացնել առողջապահական տեսչական հսկողությունը հանրապետության բոլոր ծննդատների նկատմամբ, հատյնաբերված բացթողումներն ու թերացումները դարձնել լուրջ քննարկման առարկա` անհապաղ ձեռնարկելով համապատասխան միջոցառումներ։
Նախարարը գլխավոր մանկաբարձ-գինեկոլոգին հանձնարել է հանրապետության կանանց կոնսուլտացիաներում հավանական բոլոր բարդությունների կանխարգելման համար միջոցառումներ ձեռնարկել։
Նշենք, որ այցի ընթացքում մայրաքաղաքից գործուղված մասնագետները բժշկական անհրաժեշտ օգնություն են ցուցաբերել նաև Ախուրյանի Մոր և մանկան առողջության կենտրոնում կեսարյան հատումից հետո ներքին արյունահոսությամբ ծննդկանին։ Ձեռնարկված միջոցառումների շնորհիվ կնոջ վիճակը կայունացել է, նա տեղափոխվել է «Էրեբունի» բժշկական կենտրոն։
ՀՀ առողջապահության նախարարություն
