ՌԴ նախագահին կից Մարդու իրավունքների խորհուրդը Գլխավոր դատախազությանը խնդրել է զբաղվել Ժիրինովսկու հարցով
Lenta.ru-ի փոխանցմամբ՝ ՌԴ նախագահին կից Մարդու իրավունքների խորհուրդն այսօր նամակ է հղել Գլխավոր դատախազությանը՝ խնդրելով դիմել Պետդումային, որպեսզի վերջինս իր համաձայնությունը տա քրեական գործ հարուցելու համար Ռուսաստանի լիբերալ դեմոկրատական կուսակցության առաջնորդ Վլադիմիր Ժիրինովսկու նկատմամբ:
Խորհրդի բազմաթիվ անդամների կարծիքով՝ Ժիրինովսկին ապրիլի 18-ին ցինիկաբար վիրավորել է Россия сегодня լրատվական գործակալության հղի լրագրողուհուն և նվաստացրել է նրան: Խորհրդի նախագահ Միխայիլ Ֆեդոտովը նամակում նշել է, որ Ժիրինովսկին իր արտահայտություններով ու բռնության սպառնալիքներով խոչընդոտել է լրագրողների պրոֆեսիոնալ գործունեությանը, որով և նա խախտել է քրեական օրենսգրքի 144-րդ հոդվածի 3-րդ կետը:
Բացի այդ, խորհրդում կարծում են, որ պատգամավորի օգտագործած բառապաշարն ու նրա հրապարական գործողությունները ստվեր են նետում Ռուսաստանի խորհրդարանի հեղինակության վրա, ինչպես նաև հանդիսանում են ակնհայտ անհարգալից մոտեցում ողջ հանրության նկատմամբ՝ միտված լինելով վիրավորել հավատացյալների կրոնական զգացմունքները, որով և նա խախտել է քրեական օրենսգրքի 148-րդ հոդվածի 1-ին կետը:
