Ո՞ւմ է քննադատելու ԲՀԿ-ն. «ՀԺ»
«ՀԺ»-ն գրում է. «Քաղաքական ուժերը կողմնորոշվեցին։ Արդեն հստակ է, որ կառավարության անունն այս անգամ կոալիցիոն չի լինի։
Հայ հեղափոխական դաշնակցությանը, որ մինչև երեկ չէր բացառում կոալիցիայի մաս կազմելը և հայտարարում էր, որ վերջնական որոշում կկայացնեն ապրիլի 18–ին (այսօր) սպասվող ՀՅԴ Գերագույն ժողովի ժամանակ, իշխող կոալիցիան լքելու մասին «Օրինաց երկրի» հայտարարությունից հետո չսպասեց Գժ-ին և արդեն երեկ հայտարարեց, որ մաս չի կազմելու կոալիցիային։
Մինչ այդ էլ, հիշեցնենք, ԲՀԿ-ն էր հայտարարել, որ իրեն կոալիցիայի կազմում չի տեսնում։ Այդուհանդերձ, ԲՀԿ-ն և ՀՅԴ-ն չեն բացառում նոր ձևավորվելիք կառավարության հետ որոշակի համագործակցությունը՝ հայտարարելով, որ ամեն ինչ կախված է այդ կառավարության ներկայացնելիք ծրագրից ու աշխատանքից։ Եվ ուրեմն, ինչու և ինչպես նման որոշումներ կայացվեցին։
«Բարգավաճ Հայաստան» կուսակցության գործարար հատվածի ներկայացուցիչները մեզ հետ զրույցներում նշում են, որ կոալիցիա չմտնելու և պատասխանատվություն չստանձնելու որոշումը կայացրել է կուսակցության քաղաքական հատվածը, իսկ քննարկումների ընթացքի և այդ որոշման կայացման վրա շատ մեծ է եղել հատկապես ՀՀ նախկին արտգործնախարար, ԲՀԿ-ական պատգամավոր Վարդան Օսկանյանի ազդեցությունը։
Ծառուկյանը կարծիք, բնականաբար, հարցրել է նաև մյուսներից, բայց նույն այդ գործարար հատվածը, հասկանալով, որ անիմաստ է այլ տեսակետ հայտնելը, պատասխանել է, թե հարգում է Ծառուկյանի որոշումը։ Վերջնական այղ որոշումից, սակայն, նրանք, ինչպես և սպասվում էր, խիստ դժգոհ են մնացել։
Մեզ հետ զրույցներում սույն անձինք հայտարարում են, որ իրենց պահանջն ի վերջո կատարվել է, վարչապետը փոխվել է, և դեռ ավելին, նշանակվել է այն անձը, ով ընդունելի է իրենց համար, ու եթե իսկապես ԲՀԿ-ն խնդիր ունի ինչ-որ բան երկրում փոխելու, ապա պետք է մտներ կոալիցիայի կազմ և պատասխանատվություն ստանձներ, ծրագրեր ներկայացներ, իրականացներ դրանք, վերցներ կոնկրետ ոլորտների պատասխանատվաթյուն և ապացուցեր, որ կարող է դրական զարգացումներ ապահովել։
Ըստ նրանց, սակայն, քննարկումների ժամանակ մյուսները հայտարարել են, որ եթե այժմ մտնեն կոալիցիայի կազմ, առաջիկա խորհրդարանական ընտրություններում ձայնի խնդիր են ունենալու, ուստի անհրաժեշտ է պահել ընդդիմադիր կեցվածքն ու պատրաստվել առաջիկա համապետական ընտրություններին։
Մյուս կողմից, սակայն, ինչպես նշում է գործարար հատվածը, իրենք չեն պատկերացնում, թե ինչպես են պահելու այդ ընդդիմադիր կեցվածքը ում են քննադատելու։ Սերժ Սարգսյանին ԲՀԿ-ն երբեք չի քննադատել ու անգամ չի համաձայնում նրա հրաժարականը պահանջել. Բարգավաճի թիրախը եղել է այլևս նախկին վարչապետ Տիգգրան Սարգսյանը, և գործարար հատվածը չի պատկերացնում ու չի էլ հավատում, որ նորանշանակ վարչապետ Հովիկ Աբրահամյանին, ով, հիշեցնենք, նաև իրենց կուսակցության առաջնորդի խնամին է, ԲՀԿ-ն կարող է քննադատել արմատական դիրքերից։ Համենայնդեպս, իրենք, ինչպես վստահեցնում են, նման բան չեն անի։
Որոշակի դոզայով քննադատություն ԲՀԿ-ի քաղաքական հատվածի կողմից, նրանք, իհարկե, հնարավոր են համարում, բայց ոչ երբեք իրական, արմատական քննադատություն։ Նրանք թերահավատորեն են մոտենում մյուս թևի հաշվարկին և նշում, որ եթե նույնիսկ այն իրականանա, սոցիալ-տնտեսական նայն գիծը շարունակելու դեպքում 2.5-3 տարի անց հանրապետությունում այլևս ոչինչ կարող է մնացած չլինել։ Մի խոսքով, կուսակցության կայացրած որոշումը Բարգավաճի զործարար շերտը սխալ է համարում։ Բայց ԲՀԿ-ն, ինչպես նաև մյուս քաղաքական ուժերը, այժմ մեկ գլխավոր խնդիր ունի՝ ճիշտ դիրքավորվել առաջիկա համապետական ընտրություններից առաջ»։
Մանրամասները «Հայկական Ժամանակի» այսօրվա համարում։
