Ուկրաինայի իրադարձությունները հետևանքներ կունենան Հայաստանի տնտեսության վրա. ԱՄՀ ներկայացուցիչ
Ուկրաինայի իրադարձությունները մտահոգություն են առաջացնում և դրանք հետևանքներ կունենան նաև Հայաստանի տնտեսության վրա, քանի որ Հայաստանի տնտեսությունը ՌԴ տնտեսության հետ խիստ սերտ կապեր ունի: Ինչպես այսօր լրագրողների հետ հանդիպմանը նշեց Արժույթի միջազգային հիմնադրամի հայաստանյան առաքելության ղեկավար Մարկ Հորթոնը, նույնիսկ մինչև վերջին իրադարձությունները ԱՄՀ-ն մտորում էր ՌԴ-ում տնտեսական աճի կանխատեսումը նվազեցնելու մասին:
«ՌԴ տնտեսությունը աճի տպավորիչ ժամանակաշրջան էր ունեցել, բայց դա արել էր առկա կապիտալի և ոչ թե նոր ներդրումների հաշվին, և առանց նոր կարողությունների ներդրման աճի սահմանափակումների եզրին էր: Թեպետ ՌԴ ֆինանսական վիճակը զարգացող այլ երկրների համեմատ բարվոք էր, բայց ՌԴ-ում հանրային մեծածավալ ներդրումների ծրագրեր կային, օրինակ՝ Սոչին, որ ավարտվեց: Այժմ ՌԴ-ն շարունակում է մեծ կախվածության մեջ մնալ էներգակիրների գներից, իսկ դրանց արտահանման ցուցանիշները մի փոքր այս տարի արդեն նվազել են: Տեսականորեն դա կարող է էական ազդեցություն ունենալ ՀՀ տնտեսության վրա»,- ասաց Մ.Հորթոնը՝ միաժամանակ մատնանշելով, որ ՀՀ-ից ՌԴ արտահանումն ընդամենը 280 մլն դոլար է, իսկ միայն Մոսկվայի արժեքը 400 մլրդ դոլար է, այսինքն՝ հսկայական ներուժ կա ՀՀ ապրանքների արտահանման համար:
Ըստ Հորթոնի՝ ՌԴ-ի տնտեսության հետ ՀՀ-ն սերտորեն կապված է, բայց պարտադիր չէ, որ այնտեղի իրականությունը կրկնվի այստեղ:
Անդրադառնալով ՄՄ-ին Հայաստանի անդամակցությանը՝ ԱՄՀ ներկայացուցիչը նշեց, որ մյուս շաբաթ կհրապարակվի ԱՄՀ զեկույցը, որը պարունակելու է հավելված ՄՄ անդամության մասին: Հորթոնի խոսքով՝ երրորդ երկրներից ներմուծվող ապրանքների մաքսատուրքերը կարող են բարձրանալ, քանի որ այսօր ՀՀ սակագներն ավելի ցածր են, քան ՄՄ երկրների սակագները. «Բայց ՀՀ իշխանությունները խնդրել են, որ այդ բարձր մաքսերը չկիրառվեն 1000 ապրանքների դեպքում, բանակցությունները կավարտվեն տարվա կեսերին, դրա համար դժվար է հիմա կանխատեսել որևէ ազդեցություն: Կարող է ավելանան ՄՄ երկրների կողմից ՀՀ-ին տրամադրվող ֆինանսավորումը, մասնավորապես ԱԷԿ-ի շահագործման երկարացման համար տրվող ֆինանսավորումը: Ամենամեծ ազդեցությունը գազի գնի հստակեցումն է հաջորդ հինգ տարների համար, որը տնտեսելու է 130-150մլն դոլար, որը զգալի տնտեսում է: Կարող է լինեն այլ օգուտներ՝ անվտանգության երաշխիքի և այլ տեսքով: ՌԴ իշխանությունները խստացում են իրենց երկրում աշխատանքային միգրանտների կանոնակարգումը, հնարավոր է, որ ՄՄ շնորհիվ հայ միգրանտների համար այդքան ծանր չլինի»:
Հորթոնի գնահատականով՝ Հայաստանն արդեն իսկ շատ մեծ չափով կախված է ՌԴ տնտեսությունից և ռուսական ազդեցությունն արդեն իսկ շատ մեծ է, իսկ ՄՄ շրջանակներում այդ կապերը կարող են ավելի խորանալ, և ՀՀ-ն ավելի ենթակա դառնա ՌԴ-ին:
«Մաքսային միության անդամակցության դրական կողմերը բացասականին գերազանցելու հնարավորությունը տեսականորեն կա, դա կախված է, թե ինչպես կիրականացվեն ընձեռվող հնարավորությունները: ՌԴ-ն արդեն մեծ ներդրումներ է արել ՀՀ հեռահաղորդակցության, էներգետիկ, տրանսպորտի և այլ ոլորտներում: Դրական կողմերի կողմի ավելի ծանրակշիռ լինելը ես տեսնում եմ»,- նշեց նա:
