Իտալիայում առաջարկել են ստեղծել նոր մարմին՝ Ռուսաստանի դեմ պայքարելու համար
Իտալիայի պաշտպանության նախարար Գվիդո Կրոզետոն առաջարկել է Եվրոպայում ստեղծել նոր մարմին՝ Ռուսաստանի դեմ պայքարելու համար: Այս մասին հաղորդում է Politico-ն՝ հղում անելով նախարարության կողմից հրապարակված 125 էջանոց փաստաթղթին։
Կրոզետոն պնդել է, որ Մոսկվան, ենթադրաբար, պատասխանատու է ՆԱՏՕ-ի երկրների դեմ ուղղված աղետալի հիբրիդային հարձակումների համար։ «Մենք հարձակման տակ ենք, և հիբրիդային ռումբերը շարունակում են ընկնել. գործելու ժամանակն է»,- գրել է նա։
Քաղաքական գործիչը կարծում է, որ Արևմուտքն ունի արձագանքելու համար անհրաժեշտ գործիքները, սակայն ներքաղաքական գործընթացների, ինչպես նաև Եվրամիությունում և ՆԱՏՕ-ում կոնսենսուսի վրա հիմնված որոշումների կայացման դանդաղ տեմպի պատճառով նրա հակազդեցությունները «մշտապես հետ են մնում» Ռուսաստանի գործողություններից։ Այս խնդիրը լուծելու համար Կրոզետոն առաջարկել է ստեղծել Եվրոպական հիբրիդային պատերազմի հակազդեցության կենտրոն՝ 1500 հոգանոց կիբերստորաբաժանում, և ներգրավել արհեստական բանականության, մատակարարման շղթայի պաշտպանության և ապատեղեկատվության դեմ պայքարի ռազմական փորձագետների։
