«Եվրամայդանը» ընդդիմությունից պահանջել է նախագահի միասնական թեկնածու
Lenta.ru-ի փոխանցմամբ՝ «Եվրամայդանի» Հասարակական խորհուրդը, որը համակարգում է Ուկրաինայի եվրաինտեգրմանն աջակցելուն միտված ակցիաները, ընդդիմությանը կոչ է արել հստակեցնել նախագահական ընտրություններին միասնական թեկնածուով հանդես գալու հարցը:
Այս մասին հայտարարել է այդ կառույցի ներկայացուցիչ Իգոր Կուրուսը: Նրա խոսքերով՝ թեկնածուի անունը պետք է հայտարարվի հունվարի 10-ից ոչ ուշ: Միևնույն ժամանակ հայտնի չէ, թե ակտիվիստներն ինչ կերպ կարձագանքեն, եթե մերժվեն իրենց պահանջները:
Ավելի վաղ հայտնի էր դարձել, որ նախագահական ընտրություններին մտադիր են մասնակցել երկրի բոլոր երեք խոշոր ընդդիմադիր կուսակցությունների («Բատկիվշչինա», «Սվոբոդա» և «ՈՒԴԱՌ») առաջնորդները: Ուկրաինայում նախագահական ընտրությունները պլանավորված են 2015 թվականին: Ընդդիմությոնը փորձում է հասնել նրան, որ դրանք տեղի ունենան մեկ տարի շուտ:
