Հանրապետության 10 մարզից 9-ում զրոյացվել են նախորդ տարիներին կուտակված աշխատավարձերի պարտքերը
ՀՀ տարածքային կառավարման նախարարին կից կոլեգիայի այսօրվա նիստում, որը վարել է ՀՀ փոխվարչապետ, տարածքային կառավարման նախարար Արմեն Գեւորգյանը, ներկայացվել են “Անշարժ գույքի հարկի մասին” Հայաստանի Հանրապետության օրենքի նախագիծը եւ նախագծի վերաբերյալ նախարարության մոտեցումները, հայտնում են ՏԿՆ հասարակայնության հետ կապերի բաժից:
Նախագծի մշակումը բխում է ՀՀ կառավարության որոշմամբ հաստատված` “Գույքահարկի հարկման համակարգի արդյունավետության բարձրացման ուղիները” հայեցակարգից: Անշարժ գույքի հարկի ներդրման նպատակը հողի հարկով եւ գույքահարկով հարկման համակարգի արդյունավետության բարձրացումն է, գույքահարկի եւ հողի հարկի մասով հարկային հաշվետվությունների վերացումը, հարկման բազաների ճշգրտումը եւ համակարգի վարչարարության պարզեցումը:
Նախագծով մասնավորապես առաջարկվում է հողամասերը եւ դրանց վրա կառուցված շինությունները ընդունել որպես միասնական հարկման օբյեկտ եւ դրանց համար սահմանել միասնական հարկ, ինչպես նաեւ` անշարժ գույքի հարկը սահմանել որպես ՀՀ համայնքների բյուջեներ վճարվող տեղական հարկ եւ որպես դրույքաչափեր սահմանել ներկայիս գործող հողի հարկի եւ գույքահարկի դրույքաչափերը:
Փոխվարչապետը նախագիծը համարել է ոլորտին վերաբերող բարեփոխումների առաջին փուլը, որով գործընթացն ավելի դյուրին է դառնում, կրճատվում է հաշվետվությունների թիվը: Հետագա տարիներին ոլորտի կատարելագործմանն ու պարզեցմանն ուղղված բարեփոխումները կշարունակվեն: Նա կարեւոր է համարել որոշակի խմբերի (անապահովության սահմանային միավորից բարձր միավոր ունեցող հարկ վճարողների, համայնքում գործարարությունը խթանելու նպատակով ներդրումային ծրագրեր իրականացնող սուբյեկտների) համար օրենքով արտոնությունների տրամադրման ամրագրումը եւ հանձնարարել է դրա վերաբերյալ համապատասխան առաջարկություններ ներկայացնել հեղինակներին:
Փոխվարչապետը նաեւ հանձնարարեց 2014թ. ընթացքում համապատասխան աշխատանքներ իրականացնել` համայնքներին սպասվող փոփոխություններին նախապատրաստելու համար, ինչպես նաեւ թեման ընդգրկել համայնքային ծառայողների համար նախատեսված վերապատրաստման ծրագրերում:
Կոլեգիայի նիստում ներկայացվել են նաեւ հանրապետության համայնքների սեփական եկամուտների հավաքագրման 2013թ. կատարողականի նախնական տվյալները: Նշվել է, որ համայնքների սեփական եկամուտների հավաքագրման առումով դրական դինամիկա է արձանագրվել: 2013թ. ամփոփ ցուցանիշները կներկայացվեն 2014թ. սկզբին:
Նշվել է նաեւ, որ նախնական օպերատիվ տվյալներով` հանրապետության 10 մարզից 9-ում զրոյացվել են նախորդ տարիներին կուտակված աշխատավարձերի պարտքերը: Նախորդ տարիների եւ ընթացիկ տարվա որոշ պարտքեր ունի միայն Գեղարքունիքի մարզը: Փոխվարչապետը հանձնարարեց մինչեւ հունվարի 15-ն առաջարկություններ ներկայացնել` Գեղարքունիքի մարզում եւս պարտքերի ամբողջական մարման վերաբերյալ:
Փոխվարչապետը փոխնախարարներին եւ ՏԿՆ աշխատակազմի տեղական ինքնակառավարման վարչությանը հանձնարարել է նաեւ սեփական եկամուտների` մասնավորապես, հողի հարկի եւ գույքահարկի կառուցվածքի որակական վերլուծություններ ներկայացնել, որոնք կներառեն հարկերի հաշվարկային մեծությունների դինամիկան ըստ տարիների, բազաների ամբողջականությունը եւ այլ տվյալներ:
