Պարզվել է Մոսկվայում Եգոր Շչերբակովի սպանության հարցում գլխավոր կասկածյալ ադրբեջանցու ինքնությունը
Ռուսական РИА Новости լրատվական գործակալության փոխանցմամբ՝ ոստիկանությունը պարզել է Եգոր Շչերբակովի սպանության հարցում գլխավոր կասկածյալ ադրբեջանցու ինքնությունը: Մոսկվայի ոստիկանության մամլո ծառայության ներկայացուցիչը հայտնել է, որ խոսքը 1982 թվականին Ադրբեջանում ծնված Օրհան Զեյնալով Զահիթօղլու մասին է:
Շչերբակովը սպանվել էր հոկտեմբերի 10-ի երեկոյան՝ իր ընկերուհու աչքի առջև, ինչը հանգեցրել էր Մոսկվայի հարավում գտնվող Բիրյուլևոյի շրջանում զանգվածային անկարգությունների: Դիտարկման տեսախցիկների կադրերը ցույց էին տվել, որ մարդասպանն ունի ոչ սլավոնական արտաքին:
Մոսկվայի ոստիկանությունը հայտնել է, որ Շչերբակովի սպանության կասկածյալի նկատմամբ Ադրբեջանում հայտարարված է եղել հետախուզում՝ այդ երկրում նրա կատարած սպանության համար: Ներկայումս կատարվում են նրան հայտնաբերելու աշխատանքներ:
