Այսօր Ժնևում մեկնարկում է Իրանի ու «Վեցյակի» ներկայացուցիչների միջև հանդիպումը
Իրանական IRNA լրատվական գործակալության փոխանցմամբ՝ այսօր Ժնևում մեկնարկելու է Իրանի ու «Վեցյակի» ներկայացուցիչների միջև հանդիպումը, որը շարունակվելու է նաև վաղը: Հանդիպման շրջանակներում իրանցի բանագնացները հանդիպելու են նաև ամերիկացի դիվանագետների հետ:
Այս մասին հայտարարել է Իրանի փոխարտգործնախարար Աբբաս Արաղչին: Նշվում է, որ բանակցային առաջին փուլն անցկացվելու է Իրանի արտգործնախարար, Իրանի միջուկային ծրագրի հարցով գլխավոր բանագնաց Մոհամմադ Ջավադ Զարիֆի մասնակցությամբ, ով առաջին փուլում գլխավորելու է իրանական պատվիրակությունը:
Երկրորդ փուլում իրանական կողմը գլխավորելու է Աբբաս Արաղչին: Գործակալությունը չի հայտնել, թե ինչպիսի ձևաչափով (երկկողմ կամ բազմակողմ) են անցկացվելու բանակցություններից դուրս իրանցի դիվանագետների շփումները:
Սրանից առաջ Մոհամմադ Ջավադ Զարիֆը ցանկություն էր հայտնել «Վեցյակի» հետ հաջորդ հանդիպումն անցկացնել արտգործնախարարների մակարդակով:
